(Díli), Kaikoli 06/10/2026 – Dalan ba dezenvolvimentu enerjia renovável iha Timor-Leste loke liután ho asinatura akordu servisu konsultoria entre Ministériu Obras Públikas (MOP), Eletricidade de Timor-Leste, E.P. (EDTL, E.P.) no International Finance Corporation (IFC), hodi prepara projetu enerjia anin (wind power) ba produsaun eletrisidade iha nasaun ne’e.
Akordu ne’e asina no konsidera hanesan pasu importante ida hodi prepara projetu enerjia anin ne’ebé iha objetivu atu aumenta fonte enerjia renovável no, iha tempu naruk, hamenus dependénsia Timor-Leste ba kombustível importadu.
Prezidente Komisaun Ezekutiva EDTL, E.P., Paulo da Silva, hateten katak koperasaun ho IFC sei ajuda tebes iha preparasaun teknika no dokumentus nesesáriu antes projetu tama ba prosesu konkursu.
“Ohin asina akordu ne’e ho IFC hodi bele fó asisténsia téknika kle’an liu ligadu ba preparasaun dokumentus konkursu nian atu nune’e bele lansa iha tinan oin bainhira buat hotu la’o di’ak, espera katak meia ka fim tinan 2027 bele asina ona Power Purchase Agreement ba projetu refere,” hateten Prezidente Komisaun Ezekutiva EDTL, E.P.,Paulo da Silva iha Kaikoli, 06/10/2026.
Liuhusi akordu ne’e, IFC sei fó asisténsia téknika ba EDTL, E.P. hodi ajuda estuda no prepara projetu eólika ne’ebé bele dezenvolve iha Timor-Leste. Estudu sei haree liu-liu ba potensialidade iha lokalidade rua, mak Larigutu, Munisípiu Viqueque, no Oéleo, Munisípiu Bobonaro.
Diretór World Bank Timor-Leste, David Freedman, hateten katak asinatura akordu ne’e estabelese enkuadramentu ba asisténsia teknika ne’ebé IFC sei fornese ba EDTL, E.P.
“Liuhusi akordu ida ne’e, IFC sei servisu hamutuk ho EDTL hodi estuda kle’an ba posibilidade atu dezenvolve projetu eletrisidade iha fatin rua, mak Larigutu, Munisípiu Viqueque, no Oéleo, Munisípiu Bobonaro,” nia hatutan.
Ministru Obras Públikas, Samuel Marçal, mós konsidera akordu ne’e hanesan parte husi planu tempu naruk Governu nian atu dezenvolve fonte enerjia alternativu no sustentável.
“Apresia tebes ba tékniku, EDTL ho ekipa hotu ne’ebé halo esforsu tomak hodi estuda no realiza. Liuhusi akordu ne’e, espera bele hahú ona buat balun hodi ajuda Governu iha utilizasaun enerjia anin ba eletrisidade,” nia hateten.
Projetu enerjia anin ne’e konsidera iha potensialidade atu sai alternativa ba fonte eletrisidade ne’ebé agora sei depende maka’as ba kombustível importadu. Se implementasaun la’o tuir planu, enerjia anin bele sai parte husi esforsu Timor-Leste nian atu hetan eletrisidade ne’ebé sustentável no, iha tempu naruk, bele ajuda hamenus kustu no dependénsia ba fonte enerjia hosi li’ur.
Ba Timor-Leste, inisiativa ne’e la’ós de’it kona-ba konstrusaun infraestrutura enerjia foun, maibé mós kona-ba buka dalan ba futuru enerjia ne’ebé liután sustentável. Estudu no preparasaun teknika sei determina kapasidade no viabilidade projetu antes tama ba faze implementasaun.
Jornalista: Madalena/Indaria
Editor: Ana Maria da Silva
