DÍLI, 20 Novembru 2026 (FAROL) – Organizasaun Timor-oan Unidade ba Nafatin (TUBAN) husu Governu Timor-Leste atu kria lei espesiál ne’ebé hanaran “Lei Palomita”, nu’udar instrumentu legál atu prevene omisídiu no hametin protesaun ba feto, labarik feto no juventude, depois feto ida naran Palomita Gusmão Guterres sai vítima omisídiu iha loron 18 Novembru 2026.
Organizasaun TUBAN hato’o sentimentu tristeza no lamentasaun ba mate Palomita, no apela ba Governu atu foti medida konkretu no efetivu hodi kombate violénsia hasoru feto, labarik feto no juventude iha Timor-Leste.
Porta-voz TUBAN, Natachya de Jesus, afirma katak kazu omisídiu ne’e la’ós akontesimentu ida-ne’ebé izoladu, maibé reflete problema violénsia hasoru feto ne’ebé kontinua akontese iha sosiedade.
“Akontesimentu ida ne’e reprezenta kazu sira antes too agora ba feto sira, ba inan sira ne’ebé rezulta husi kauza ignoránsia no sentidu dez-umanu,” afirma porta voz Natachya de Jesus.
TUBAN mós propoin atu Governu kria “Lei Palomita” ho sansaun rigorozu ba autór violénsia, nu’udar instrumentu legál atu prevene kazu omisídiu no violénsia hasoru feto. Organizasaun ne’e mós konsidera julgamentu públiku ba kazu sira ne’ebé akontese, tuir lei no ho garantia ba prosesu justisa.
“Ami hakarak husu ba Governu atu tau prioridade ba asaun sira ne’e, Ami nota katak governu ida-ba-ida laiha mekanizmu prevensaun diak duké halo resposta ka asaun imidiata wainhira akontesimentu iha ona, Omísidiu, violénsia hasoru feto no labarik feto sira, online no sibernétika, seluktan.” Natachya Hatutan.
Aleinde ne’e, organizasaun TUBAN mós hato’o preokupasaun kona-ba implementasaun rezolusaun no konvensaun internasionál sira ne’ebé relasiona ho Violénsia Bazeia ba Jéneru, Feto, Pás no Seguransa, Eliminasaun Violénsia Kontra Feto no Labarik Feto, Protesaun Labarik no Prevensaun Tráfiku Umanu.
Sira konsidera katak Governu presiza la’ós de’it fó resposta depois kazu violénsia akontese, maibé tenke hametin mekanizmu prevensaun, protesaun no intervensaun sedu atu evita vítima sira seluk.
TUBAN apela ba Governu no sosiedade tomak atu hamutuk luta kontra violénsia, promove respeitu ba direitu umanu no prezerva legadu eróis no mártires sira, hodi harii Timor-Leste ne’ebé hakmatek, seguru no livre husi violénsia.
Jornalista: Indária Soares Belo / Madalena De Lima
Editor : Manuel Andrade















