Konsellu Imprensa Timor-Leste sigla portugues (CI-TL) hahú prepara planu estratéjiku foun ba períodu 2027–2031, liuhosi prosesu konsultasaun no diskusaun ho reprezentante média sira, asosiasaun jornalista no jornalista sira, atu avalia desempenhu instituisaun durante tinan lima ikus no haree ba dezenvolvimentu setór komunikasaun iha futuru.
Prosesu konsultasaun ne’e inklui Focus Group Discussion (FGD) ho média-na’in sira, atu rona sira-nia perspetiva no hanoin kona-ba desempenhu Konsellu Imprensa, inklui desempenhu média rasik durante tinan lima ne’e.
Iha entrevista Diretór Ezekutivu António Dias hatete katak reprezentante Konsellu Imprensa esplika katak planu estratéjiku foun sei konsidera mudansa iha asesu ba informasaun no dezenvolvimentu plataforma komunikasaun, husi era analójika ba era dijitál, to’o agora ne’ebé mundu komunikasaun hahú tama ona iha era Inteligénsia Artifisiál (IA).
“Entaun komo períodu ne’e ita agora hau fali atu halo plano estratéjiku foun ba 2027 to 2031 entaun perspektiva ne’e riku ne, ho hanoin ho oin ita halo tiha ba munisípiu sira hotu, territóriu sira timor laran, pratu haree asesu ba informasaun ne’ebé, asesu ba plataforma ida ne’ebé. Informasaun sira mak sira asesu.” Hatete Diretór Ezekutivu António Dias iha salaun konselho inprensa timor-leste 19/11/2026.
Nia mós hato’o preokupasaun kona-ba impaktu teknolojia Inteligénsia Artifisiál ba servisu jornalista sira no média iha future.
“Ohin loron ita to’o ona iha intelijênsia artifisial agora preokupa Será ke intelijênsia artifisial ne’e atu ajuda jornalista sira ho media sira ka atu troka media husi jornalista sira Entaun tamanema ita buka dalan hamutuk, Konsellu Imprensa nia hanoin katak biar teknolojia oinsa, mas teknolojia la bele troka ema. Entaun, jornalista nia servisu nafatin fundamental atu iha era ida ne’e bele moris nafatin, sobrevive avansu teknolojia sira ne’ebé iha.” Nia hatutan
Além ne’e, prosesu avaliasaun ne’e sei haree mós ba rezultadu implementasaun planu estratéjiku tinan lima ikus, liuhosi entrevista direta no diskusaun grupu ho parte relevante sira, atu hatene meta no indikadór sira ne’ebé determina ona atinji ka seidauk.
Rezultadu hosi prosesu konsultasaun no avaliasaun ne’e sei sai baze atu hadi’a estratéjia no determina prioridade sira ba tinan lima oin mai, ho objetivu atu garante katak média, jornalizmu no Konsellu Imprensa kontinua iha relevánsia no efetividade.
Iha parte seluk, Konsellu Imprensa mós temi kona-ba prosesu revizaun Lei Komunikasaun Sosiál. Instituisaun ne’e hatama ona proposta revizaun ba Sekretaria Estadu Komunikasaun Sosiál, no agora hein prosesu tuir mai iha instituisaun ne’e.
“Lei komunikasaun sosial hanesan ita hotu hatene Konsellu Imprensa hatama nia proposta revisaun ba Sekretaria Estadu Komunikasaun Sosial agora por sua vez hela Sekretaria Estadu Komunikasaun Sosial nian lima, tamba hosi neba mak sira ba Konsellu Ministru, depois tama ne’e lei sira ba Parlamentu. Mas Konsellu Imprensa nia funsaun hotu ona. Diskusaun hamutuk Sekretaria Estadu Komunikasaun Social mos hala tiha.” nia afirma
Konsellu Imprensa hein katak liuhosi kolaborasaun no diálogu ho parte relevante sira, liberdade imprensa no liberdade espresaun bele kontinua hetan protesaun no hametin iha Timor-Leste.
Ekipa: Media Mudansa















