(Díli) kampus sentral 17/11/2026 – Selebrasaun aniversáriu ba-dala 26 Universidade Nasionál Timor Lorosa’e (UNTL) sai momentu importante atu reflete fila fali kontribuisaun, sakrifísiu no esperansa husi jerasaun oin-oin ne’ebé hamutuk harii no dezenvolve instituisaun ensinu superiór públiku ida-ne’e. Iha okaziaun ne’e, Reitor UNTL, Juviano António da Costa, apelu ba komunidade akadémika tomak atu hametin responsabilidade, dedikasaun, dignidade, fraternidade no solidariedade hodi kontinua prepara rekursu umanu ho kualidade ba futuru.
Iha nia intervensaun, Reitor UNTL Juviano António da Costa husu espesialmente ba dosente sira atu hala’o sira-nia knaar ho responsabilidade profisionál, kompromisu no integridade, hodi sai ezemplu di’ak ba estudante sira no komunidade akadémika.
“Hau husu ba ita-bo’ot sira hotu, liu-liu dosente sira iha UNTL, atu servisu ho di’ak, responsabilidade bo’ot, dedikasaun, dignidade, fraternidade no humanidade koloka ita-bo’ot sira-nia personalidade iha fatin ne’ebé dignu, hodi hetan respeitu no evita asaun sira ne’ebé bele lori risku ba imi-nia an rasik,” hatete Reitor UNTL Juviano António da Costa iha kampus central 17/11/2026.
Nia subliña katak kontribuisaun, dedikasaun no sakrifísiu hosi dosente sira iha prosesu edukasaun tenke hetan apresiasaun no respeitu husi estudante, alumni no komunidade tomak maske dala barak profesór sira la hetan rekonesimentu adekuadu, ida-ne’e la bele sai razaun atu trata sira ho maneira ne’ebé la respeitu.
“Maske profesór sira konsidera hanesan herói ne’ebé dala barak la hetan rekonesimentu, maibé pelo menus sira labele hetan tratamentu ne’ebé la di’ak, kondenasaun ka insultu husi ema sira ne’ebé la hatene agradese,” nia hatutan.
Reitor mós lembra katak edukasaun mak xave prinsipál ba dezenvolvimentu nasaun, no dosente sira iha universidade sai nu’udar protagonista importante iha prosesu ne’e. Tuir nia, profisionál no lideransa iha área oin-oin, hanesan enjenharia, saúde, justisa, administrasaun, ekonomia, polítika no siénsia, hotu-hotu liu hu7si prosesu formasaun akadémika ne’ebé universidade kontribui ba.
Ba estudante sira, Reitor hato’o mensajen atu orgullu sai estudante UNTL, aproveita oportunidade ne’ebé sira hetan no fó prioridade ba aprendizajen no dezenvolvimentu kapasidade pesoál.
“Prepara imi-nia futuru ho didi’ak, hahú hosi agora. The future starts now. Please don’t waste your time, otherwise you will regret it. Estuda, aprende ho imi-nia dosente sira, respeita no dignifika sira, tanba dosente sira mós sai nu’udar inan-aman segundu ba imi iha kampus,” nia apela.
Reitor mós hato’o importánsia atu kria ambiente kampus ne’ebé seguru, komfortável, saudável no hakmatek, hodi suporta prosesu aprendizajen no garante formasaun graduadu ho kualidade.
Iha serimónia ne’e Vise-Primeiru Ministru no Ministru Kordenadór ba Asuntu Sosiál, Eng. Mariano Assanami Sabino, mós hato’o apresiasaun ba kontribuisaun husi jerasaun estudante, dosente, alumni no funsionáriu sira ne’ebé durante tinan 26 nia laran partisipa diretamente iha dezenvolvimentu UNTL no konstrusaun rekursu umanu Timor-Leste nian.
Nia konsidera katak aniversáriu UNTL nian la’ós de’it momentu atu komemora idade instituisaun akadémika ida, maibé mós oportunidade atu hanoin fila fali istória luta, sakrifísiu no esperansa husi ema hotu ne’ebé kontribui ba fundasaun no dezenvolvimentu universidade ne’e.
“Aniversáriu UNTL nian la’ós de’it momentu atu komemora idade instituisaun akadémika ida, maibé mós atu hanoin fila fali istória luta, sakrifísiu no esperansa hosi ema hotu ne’ebé kontribui ba harii universidade ne’e,” hatete Vise-Primeiru Ministru no Ministru Kordenadór ba Asuntu Sosiál, Eng. Mariano Assanami Sabino.
Ministru mós lembra katak UNTL kontinua hala’o nia knaar importante maski iha tempu konflitu no situasaun difísil, ne’ebé obriga estudante balu atu interrompe sira-nia estudu. Maski hasoru obstákulu sira, estudante balu kontinua persevera to’o remata sira-nia estudu, inklui to’o nivel doutoramentu.
Iha nia mensajen, Eng. Mariano Assanami Sabino enfatiza katak universidade tenke sai espasu ida ne’ebé promove hanoin kritiku, diálogu, peskiza no debate konstrutivu. Nia enkoraja estudante no dosente sira atu uza koñesimentu no razaun bainhira hato’o kritika ka diskorda ho ema seluk, no kontinua mantein respeitu malu.
“Demokrasia presiza espasu ba diferensa hanoin, maibé diferensa ne’e tenke trata ho maneira sivilizada, la’ós liuhosi atake pesoál ka konflitu,” Nia hatutan.
Iha parte ikus, Ministru enkoraja komunidade akadémika UNTL atu hametin unidade iha diversidade, respeita diferensa hanoin no servisu hamutuk ba interese nasionál.
Tuir nia, universidade tenke kontinua sai sentru koñesimentu, inovasaun no afirmasaun identidade nasionál, hodi prepara jerasaun foun ne’ebé iha kapasidade atu responde ba dezafiu no kontribui ba futuru Timor-Leste.
Selebrasaun Dies Natalis UNTL ba-26 ne’e, nune’e, la’ós de’it momentu atu selebra jornada institusionál universidade nian, maibé mós konvite ba komunidade akadémika tomak atu kontinua hamutuk, hametin kompromisu no responsabiliza an ba misaun bo’ot ida: forma rekursu umanu ho kualidade no kontribui ba dezenvolvimentu sustentável Timor-Leste nian.
Ekipa: Media Mudansa















