Governu Aloka Dolar Milliaun 1.000 ba Infraestrutura, Execusaun To’o Ona 72,7%

‎(Bobonaro) Suku Holsa Sene 14/11/2026 – Governu Konstitusionál IX aloka ona orsamentu besik dolar amerikanu milliaun 1.000 ba setór infraestrutura durante períodu Jullu 2023 to’o Novembru 2026. Hosi orsamentu ne’e, ezekusaun to’o agora atinji ona dolar milliaun 750 ka 72,7%. Ida ne’e hatete husi Ministru Planeamentu no Investimentu Estratéjiku, Gastão Francisco da Sousa orador ba atividade meet the press organiza husi Sekretariu Estadu Komunikasaun Sosial (SECOMS) iha bobonaro

‎Ministru Planeamentu no Investimentu Estratéjiku, Gastão Francisco da Sousa, hateten katak investimentu iha infraestrutura nu’udar baze importante ba dezenvolvimentu nasionál no haforsa ekonomia lokál.

‎Ministru esplika katak Governu halo investimentu iha área importante sira, inklui bee, saneamentu, estrada, eletrisidade, edifísiu públiku no transportes.

‎“Tamba nia mak baze ba dezenvolvimentu nasionál nomós bele haforsa ekonomia lokál,” Hatete Ministru Planeamento no investimento estratéjiko Sr Gastao Francisco da sousa iha Bobonaro foin lalais nee.

‎Nia fó ezemplu katak bainhira estrada no eletrisidade disponivel iha komunidade sira ne’e  oportunidade ekonomia lokál mós bele dezenvolve, inklui negosiu ki’ik hanesan kioske no loja sira ne’ebé bele fó servisu ba komunidade no atende viajante sira.

‎Ministru mós hateten katak hosi investimentu infraestrutura ne’ebé Governu halo, maioria bo’ot liu aloka ba konstrusaun estrada no ponte sira.

‎Ba Munisípiu Bobonaro, nia afirma katak estrada barak liu ona implementa, inklui kontratu sira ne’ebé hela iha prosesu ezekusaun.

‎Iha parte seluk, Ministru Gastão subliña katak Governu la fó prioridade de’it ba infraestrutura, maibé mós ba dezenvolvimentu rekursu umanu liuhosi Fundu Dezenvolvimentu Kapital Umanu.

‎Nia esplika katak investimentu ba bolsa estudu aumenta husi tinan ba tinan, ho orsamentu dolar milliaun 12 iha 2023, milliaun 9,7 iha 2024, milliaun 13,9 iha 2025 no milliaun 18 iha 2026.‎

‎Ministru apela ba autoridade lokál no família sira atu fó atensaun ba oportunidade bolsa estudu ne’ebé Governu sei loke bazeia ba mérito, atu joven timoroan sira iha oportunidade atu kontinua sira-nia estudu no dezenvolve kapasidade.

‎Além ne’e, Ministru mós ko’alia kona-ba prioridade infraestrutura ba tinan oin, ne’ebé sei inklui setór saúde, edukasaun no polísia, inklui infraestrutura ba instituisaun polísia.

‎Nia hateten katak Governu sei kontinua halo esforsu atu hadi’a estrada nasionál no estrada rejionál, maibé implementasaun sei halo tuir fase no prioridade ne’ebé eziste.

‎Iha kontestu preparasaun ba Timor-Leste nia responsabilidade internasionál, Ministru subliña katak infraestrutura sei sai prioridade importante, liu-liu atu prepara país ba presidénsia ASEAN iha 2029 no presidénsia CPLP iha 2028.

‎Nia mós refere ba konstrusaun sentru konvensaun no esforsu atu atrai investidór sira atu investe iha konstrusaun hotel, hodi bele simu delegasaun no lideransa internasionál sira ne’ebé sei mai Timor-Leste.

‎Ministru remata katak Governu sei kontinua investe atu hadi’a no konstrói infraestrutura ne’ebé presiza, hodi prepara Timor-Leste atu kumpre responsabilidade internasionál sira iha futuru.

‎

‎                     Ekipa: Media Mudansa

‎