(Ainaro), 21/10/2026 – Autoridade Protesaun Sivíl (APC) kontinua hametin konsiénsia komunidade kona-ba importánsia prevensaun no preparasaun hasoru risku dezastre naturál, liuhosi kampaña públiku sensibilizasaun ne’ebé hala’o iha Aldeia Gourema, Suku Horai-Quic, Postu Administrativu Maubisse, Munisípiu Ainaro.
Komandante Autoridade Protesaun Sivíl Munisipiu Ainaro(APC), Moisés Mota Menezes katak, atividade ne’e importante ba komunidade hodi komprende risku dezastre naturál no hatene medida sira ne’ebé tenke foti hodi prevene no reduz impaktu dezastre natural, liuliu iha tempu mudansa klimátika no tempu bai-loron naruk/El Niño.
“ Hasa’e konsiénsia komunidade kona-ba prevensaun no preparasaun hasoru dezastre naturál, atu nune’e komunidade bele hatene oinsá atu proteje an inklui ho ambiente bainhira hasoru situasaun emerjénsia,”hatete Moisés Mota Menezes iha Maubise, 21/10/2026.
Nia esplika Autoriedade Protesaun Sivil (APC),hamutuk ho departamentu relevante tolu, inklui Korpu Bombeirus, kontinua fó edukasaun no informasaun ba lideransa komunitária no komunidade kona-ba medida prevensaun, preparasaun no asaun ne’ebé presiza hala’o bainhira akontese dezastre naturál.
Tuir nia, kampaña sensibilizasaun ne’e sei kontinua hala’o iha suku sira, ho objetivu atu kobre postu administrativu haat (4) iha Munisípiu Ainaro, hodi asegura katak informasaun kona-ba prevensaun risku dezastre naturál bele to’o ba komunidade sira iha área hotu.
Iha atividade ne’e, ekipa Autoriedade Protesaun Sivil (APC) fó mos esplikasaun kona-ba knaar Korpu Bombeirus, métodu rekolla dadus kona-ba dezastre naturál no prosedimentu atu fó asisténsia emerjénsia ba komunidade sira ne’ebé presiza ajuda.
Moisés Mota Menezes mós apela ba komunidade atu aumenta kuidadu no responsabilidade iha moris loro-loron, liuliu iha protesaun ambiente. Nia deklara dezastre naturál iha nasaun visinu Indonesia-Kalimantan, nu’udar ezemplu kona-ba importánsia atu foti medida prevensaun sedu hodi hamenus risku no impaktu ba ema no ambiente.
“Ha’u apela ba komunidade atu evita sunu rai sein kontrolu no tesi ai-hun arbiru, tanba hahalok hirak ne’e bele aumenta risku ba ambiente no komunidade. Prevensaun dezastre naturál la’ós responsabilidade instituisaun sira de’it, maibé responsabilidade ita hotu atu hamutuk proteje ambiente no hamenus risku dezastre,” nia afirma.
Nia subliña katak partisipasaun ativa husi komunidade, hamutuk ho instituisaun relevante sira, iha papél importante atu harii komunidade ne’ebé preparadu, seguru no reziliente hasoru risku dezastre naturál.
Jornalista : Inácio Silva
Editor :Manuel Andrade
