(Ainaro), Gourema 22/10/2026 — Xefe Aldeia Gourema, Suku Horai-Quic, Postu Administrativu Maubisse, Munisípiu Ainaro Tomas da Silva, husu klarifikasaun ba Komandu Polisia Nasional Timor-Leste Munisípiu Ainaro liga ho informasaun ne’ebé mak deskonfia sidadaun (9) na’in sia ne’ebe ho kazu na’ok kuda, Xefe Aldeia Gourema rejeita informasaun ne’e tanba, tuir nia komunidade sira hala’o hela servisu iha Kapela ou igreja,hafoin iha loron akontesimentu ne’e.
Tuir vítima,Agapito da Silva Mendonça no nia oan mane Serafin José Barros deklara katak, sira hetan violénsia fizika husi Oknum polísia ne’ebé sira identifika ho naran Adolfu, hamutuk ho Oknum PNTL na’in rua seluk, akontesementu ne’e iha loron Domingu 11 fulan Outubru tinan 2026, lokaliza iha Aldeia Gourema.
Agapito da Silva Mendonça haktuir, iha loron ne’ebá, nia ho nia oan mane (Serafin José Barros) hala’o hela servisu iha kapela. Tanba hamlaha, vitima nain rua (2) deside tun ba kios atu sosa supermi ba hán. Maibé, antes sira sosa Oknum polísia ne’e ho nia membru na’in rua to’o iha fatin no husu sira kona-ba razaun ne’ebé sira hela iha ne’ebá.
“Ha’u esplika ba sira katak ami hamlaha, tanba ne’e mak ami tun mai atu sosa hahán,”hateten Vitima Agapito iha aldeia Gurema 22/10/2026
Tuir nia, Oknum PNTL ne’e haruka sira hasai fotografia no husu sira nia razaun kona-ba pedidu ne’e, Agapito alega katak komandante ne’e hahú tuku, basa no tebe nia oan mane Serafin José Barros.
Agapito mós salienta katak, bainhira nia husu deskulpa no esplika katak sira la halo sala, Oknum ne’e ba foti ai-suak no fila mai baku nia iha kanotak no ulun, to’o nia monu ba rai.
“Ha’u husu deskulpa no esplika katak ami la halo sala, maibé nia ba foti ai-suak no baku ha’u iha kanotak no ulun, to’o ha’u monu ba rai,” nia haktuir.
Serafin José Barros konfirma, katak nia no nia aman (Agapito) tun ba kios atu sosa hahán tanba hamlaha. Nia dehan katak, depois nia la konkorda atu hasai fotografia, Oknum ne’e alegadamente halo agresaun fiziku hasoru vitima agapitu no nia oan mane konseque halai ba to’os laran hodi salva a’an husi situasaun ne’e.
“Ha’u halai ba to’os laran, maibé ha’u haree nia (Oknum PNTL) kontinua uza ai-suak baku ha’u-nia aman,” hatutan Serafin.
Depois akontesimentu ne’e, Agapito relata katak kolega sira ne’ebé hala’o servisu iha kapela mai husu esplikasaun ba Oknum polísia sira ne’e. Nia mós dehan, hafoin akontesementu ne’e komunidade balun ho nervozu halo asaun baku kareta no motorizada membru polísia sira nian.
Iha parte seluk, Xefe Aldeia Gourema Tomas da Silva, la konkorda ho informasaun kona-ba komunidade (9) na’in sia ne’ebé alegadamente envolve iha kazu na’ok kuda. Nia esplika katak, tuir nia hatene katak, iha loron 11 Outubru 2026, komunidade sira hala’o hela servisu iha igreja, tuir avizu ne’ebé katekista no xefe aldeia sira simu.
“Ha’u la konkorda ho informasaun kona-ba komunidade na’in sia ne’ebé liga ho kazu na’ok kuda, tanba tuir ha’u-nia koñesimentu, iha loron ne’ebá sira hala’o servisu iha igreja,”hatete sefe Aldeia Tomas da Silva .
Nia husu ba relevante ,liu-liu Komandu PNTL Munisípiu Ainaro no Esquadra PNTL Postu Administrativu Hatu-Builico, atu fó klarifikasaun kona-ba informasaun ne’ebé hato’o ba mídia no asegura katak informasaun públika bazeia ba faktu ne’ebé verifika ona.
Tomas da Silva mós rekomenda atu halo investigasaun kona-ba alegasaun violénsia fizika ne’ebé vítima sira hato’o, no garante katak Oknum PNTL sira ne’e la hala’o knaar ho profesionalizmu,no PNTL lolos tenki servisu ho responsabilidade no respeitu ba direitu fundamentál sidadaun.
To’o notísia ne’e prepara, redasaun Medía Mudansa seidauk simu resposta ofisiál husi Komandu PNTL Munisípiu Ainaro kona-ba alegasaun vítima sira no bazeia investigasaun ne’ebé liga suspeitu na’in sia ho kazu na’ok kuda.
Jornalista : Inácio Silva
Editor :Manuel Andrade
