(Díli),Bebora 22/10/2026 – Oportunidade ba Timor-Leste hodi hakat ba merkadu internasionál no haburas produtu lokal, dalan importante ida ba dezenvolvimentu ekonomia nasionál. Iha esforsu atu aproveita oportunidade ne’e, Timor-Leste no China hametin kooperasaun bilateral iha setór komérsiu no indústria, liuhusi enkontru ne’ebé foka ba asesu merkadu, promosaun produtu no oportunidade investimentu.
Ministru Komérsiu no Indústria, Filipus Nino Pereira relata,enkontru bilateral ne’e importante atu hafoun no reafirma kompromisu kooperasaun entre nasaun rua, ne’ebé hahú ona liuhusi enkontru entre Prezidente Repúblika Demokrátika Timor-Leste no Prezidente China iha tinan 2024.
“Koperasaun ida ne’e abranze para oinsá ita progresivu liután atu aselera oportunidade ekonómiku entre nasaun rua ne’e. Ita hakarak oportunidade ne’e iha relasaun ne’ebé maka metin liután,” dehan Filipus Nino Pereira iha Bebora 22/10/2026.
nia salienta,Timor-Leste asesu ba merkadu China bele sai oportunidade atu promove produtu lokál no loke dalan ba komérsiu ho merkadu ne’ebé espanda luan liután. Maibé, atu atinje objetivu ne’e, sei presiza fó atensaun ba prosesu no regulamentu alfándega ne’ebé bele sai dezafiu ba exportadór sira.
Ministru Filipus Nino Pereira esplika katak, iha ona produtu Timor-Leste ne’ebé tama ba merkadu China, maski nafatin iha obstákulu balun ne’ebé presiza rezolve.
“Ita nia produtu lubuk mak tama iha merkadu China, maibé ita hasoru problema liu-liu kona-ba regulamentu ne’ebé alfándega iha. Maibé ohin iha afirmasaun iha China aplika zero tarifa ba Timor-Leste, no sira mós prepara plataforma lubuk ida ba promosaun nian,” nia hatutan.
Afirmasaun kona-ba tarifa zero no preparasaun plataforma promosaun ne’e bele sai oportunidade ba emprezáriu no setór privadu sira iha Timor-Leste,atu buka merkadu foun, promove produtu nasionál no dezenvolve ligasaun komersiál ho parseiru sira iha China.
Ho kooperasaun ne’ebé kontinua hametin, espetativa mak oportunidade sira ne’e la’ós de’it sai akordu iha nivel governu, maibé bele transforma ba atividade komersiál no investimentu ne’ebé fó benefísiu ba ekonomia no povu husi nasaun rua.
Jornalista : Indária Soares / Benilda dos Santos
Editor :Manuel Andrade
