(Díli), Kaikoli 28/09/ 2026- Aliansa Nasional Kombate Crime Infantisídiu Timor-Leste (ANCITL) rejista kazu so’e bebé hamutuk lima (5) durante períodu Janeiru to’o Setembru 2026.
Dadus ne’e aprezenta husi ANCITL iha konferénsia imprensa ne’ebé hala’o iha FONGTIL, Tuir dadus no gráfiku ne’ebé ANCITL aprezenta, kazu sira ne’e akontese iha munisípiu tolu mak hanesan Likisá rejista kazu rua (2), Díli kazu rua (2), no Ainaro kazu ida (1).
Diretór Ezekutivu ANCITL José Turky, hatete, organizasaun ne’e kontinua servisu hamutuk ho autoridade relevante sira, inklui Ministériu Públiku, atu identifika ema sira ne’ebé sai suspeitu hodi envolve iha kazu sira-ne’e.
“ANCITL servisu hamutuk ho autoridade parte hotu no halo parseriu ho Ministériu Públiku (MP) atu bele identifika autor prinsipál sira, Autor mane presiza tempu atu identifika, tanba iha realidade sosiedade agora ne’e ema balun seidauk hakarak rekoñese nia sala,” hateten José Turky iha konferensia Emprensa,Kaikoli, 28/09/2026.
José Turky mos preokupasaun kona-ba dispozisaun iha Kódigu Penál, liuliu Artigu 142 kona-ba krimi infantisídiu, ne’ebé, tuir interpretasaun ANCITL, foka responsabilidade ba inan no seidauk define ho klaru papel ka responsabilidade autor mane ka aman iha kazu sira-ne’e.
ANCITL rekomenda ba Parlamentu Nasionál atu konsidera revizaun ba Artigu 142 Kódigu Penál, atu bele konsidera mos papel no responsabilidade autor mane sira iha kazu infantisídiu no so’e bebé.
“ANCITL rekomenda ba Parlamentu Nasionál, nu’udar órgaun ne’ebé iha papel importante, atu halo revizaun ba Kódigu Penál Artigu 142, ne’ebé ko’alia kona-ba infantisídiu iha Timor-Leste, hodi bele integra mos papel autor mane sira nian iha krime so’e bebé,” Nia rekomenda
Iha oportunidade ne’e, ANCITL mos apela ba lideransa no instituisaun relijioza sira atu partisipa ativu iha esforsu prevensaun, liuhusi mensajen edukativu no atividade relijioza, hodi aumenta konsiénsia komunidade kona-ba responsabilidade no protesaun ba labarik no família.
“ba parte relijiozu sira, iha selebrasaun no eventu boot sira, atu fó mensajen no transmite ensinamentu bíbliku ba komunidade kristaun sira kona-ba oinsá atu servisu hamutuk ho sosiedade hodi proteje komunidade no prevene kazu so’e bebé ne’ebé kontinua akontese,” hateten nia.
Bazeia ba situasaun ne’ebé rejista, ANCITL afirma katak sei kontinua hala’o edukasaun seksuál no reprodutiva, liuliu ba estudante ensinu sekundáriu sira. Enkuantu Programa ne’e foka ba aumentu koñesimentu, responsabilidade no komprensaun estudante sira kona-ba saúde seksuál no reprodutiva, no konsekuénsia hosi desizaun no asaun sira ne’ebé sira halo.
Ekipa Media Mudansa
