DÍLI, Santa Cruz, 12/11/2026 – Timor-Leste komemora dala 35 Masakre Santa Cruz, hodi fó omenajen no hanoin hikas sakrifísiu juventude no povu Timoroan sira ne’ebé lakon sira-nia vida iha luta ba ukun-rasik-an, durante masakre ne’ebé akontese iha 12 Novembru 1991.
Komemorasaun ne’e sai hanesan momentu importante atu hametin memória istórika no valoriza sakrifísiu mártir no herói sira ne’ebé kontribui ba libertasaun nasionál.
Iha okaziaun ne’e, Prezidente Komité 12 de Novembro, Gregório Saldanha, hateten katak ran lulik ne’ebé fakar iha Santa Cruz sai hanesan símbolu sakrifísiu boot ba libertasaun nasionál no sai parte importante ida husi istória luta povu Timoroan nian.
Nia mós apela ba povu Timoroan hotu atu kontinua hametin unidade nasionál, tanba unidade mak sai hanesan baze importante ba dezenvolvimentu nasaun nian.
“Ha’u konvida ita hotu atu halo renovasaun ba pasu unidade nasionál ne’ebé ita presiza tebes, atu ajuda ita-nia servisu loroloron no bele manan dezenvolvimentu nasionál ne’ebé Timor-Leste no nia povu presiza tebes,” Gregório Saldanha hatutan.
Iha fatin hanesan, Vice-Primeiru-Ministru, Mariano Assanami Sabino, esplika katak loron 12 de Novembru la’ós de’it loron feriadu, maibé momentu importante ida atu povu kontinua selebra, hanoin no fó valor ba sakrifísiu ne’ebé juventude no povu Timoroan sira halo ba libertasaun.
“Ohin loron atu ita halo refleksaun, loron atu ita para no hanoin hikas katak unidade nasionál ita sosa ho ruin no ran, tanba to’o ohin loron, sira lubuk ida nia restu mortais seidauk halibur. Sira iha ne’ebé de’it, Timor-Leste ne’e Jardim do Herói,” Mariano Assanami Sabino deklara.
Komemorasaun aniversáriu dala 35 Masakre Santa Cruz ne’e sai hanesan apelu ba jerasaun ohin no aban-bainrua atu labele haluha sakrifísiu mártir no herói sira. Aleinde ne’e, povu Timoroan presiza kontinua hametin unidade nasionál no fó kontribuisaun ba harii dezenvolvimentu Timor-Leste.
Jornalista: Indária Soares Belo
Editor : Manuel Andrade
