(Díli), 22/24/2026-,Caicoli- Ministériu Edukasaun (ME) no Ministériu Saúde (MS) promove programa edukasaun kona-ba moras la hada’et,objetivu atu aumenta koñesimentu no konsiénsia públiku, liuliu iha ambiente eskola no importánsia prevensaun no adosaun hahalok moris ho saudavel.
Ministériu Edukasaun servisu hamutuk ho Ministériu saúde, Assosiasaun medikus Timor-Leste no Assosiasaun Aliansa Nasional Prevensaun Moras La Hada’et, hetan apoiu husi Gabinete apoiu sosiedade sivil hahú atividade kampaña saúde kona-ba prevensaun moras la hada’et.
Ministra edukasaun Dulce de Jesus Soares relata, programa ne’e importante hodi garante komunidade eskolar, hanesan estudante presija matenek no saudavél hodi prepara ba futuru nasaun nian.
“Estudante hanesan Jovén no labarik sira mak jerasaun futuru nasaun ida ne’e nian, ita hatete se sira matenek maibe sira nia saúde ladiak sira labele sai sidadaun adultu ida ne’ebé aban bainrua kontribui ba nasaun ida ne’e” hatete Dulce de Jesus Soares foin lalais ne’e.
Nia salienta,kurikullum eskola komesa husi pre-eskolar iha ona materia saudé no hijiene maibe liuhusi programa ne’e haforsa liután sidadaun hotu nia koñesementu no hatene prevensaun konaba moras no hatene estillus ba moris ne’ebé saudavél.
Fatin hanesan Diretór Nasionál Prevensaun Kontrolu Doença, Constantino Lopes hatete, programa saúde ne’e la’o ba instituisaun hotu-hotu atu halo prevensaun, kontrolu no edukasaun saúde ba instituisaun sira hotu-hotu.
“Moras la hada’et, ida barak liu mak hipertensaun ho numeru kuaze 55 mil mak hetan moras ida ne’e no depois moras diabetes kuaze ema 5 mil kompara ho moras la hada’et sira seluk. Tamba ne’e Ministerio saúde sei kontinua halo esforsu ba prevensaun no metigasaun moras la hada’et ne’ebé iha.” Constantino Lopes hatutan.
Nia relta,esforsu prevensaun presiza envolve instituisaun públika sira, eskola, família no komunidade atu aumenta konsiénsia kona-ba fator risku no importánsia atu halo kontrolu saúde sedu.
Enkuntu liuhusi kolaborasaun entre Ministériu Edukasaun no Ministériu Saúde, programa ne’e hein katak bele hametin prevensaun iha ambiente eskolar no komunidade tomak. Edukasaun saúde la’ós de’it responsabilidade setór saúde, maibé presiza apoiu husi setór edukasaun, família no instituisaun hotu-hotu atu asegura jerasaun futuru ne’ebé iha koñesimentu, moris saudavel no prontu atu kontribui ba dezenvolvimentu nasaun.
Jornalista :Madalena de Lima
Editor :Manuel Andrdade
