(Dili), Caicoli 23/10/2026 – Teoria no prátika sai parte importante iha prosesu aprendizajen ba estudante sira. Ho hanoin ida-ne’e, estudante Departamentu Comunicação Social, Faculdade Ciências Sociais no Polítika (FCSP), Universidade Nasionál Timor Lorosa’e (UNTL), realiza expozisaun estudante tinan akademiku 2026 ho tema “Dezenvolvimentu no Inovasaun Dijitál iha Timor-Leste.
Vise-Primeiru-Ministru (VPM), Mariano Assanami Sabino hatete,apresia ba estudante sira-nia inisiativa tamba atividade hanesan ne’e importante atu ajuda estudante sira la aprende teoria de’it, maibé aplika koñesimentu ne’ebé sira hetan iha sala aula ba prátika.
“fó parabéns ba estudante Departamentu Comunicação Social- UNTL,tanba sira iha hanoin inovativu hodi realiza atividade ida-ne’e. Estudante no joven sira mak esperansa ba futuru. Atividade hanesan ne’e importante tanba estudante sira la bele aprende teoria de’it, maibé tenki lori teoria ba prátika,” dehan Mariano Assanami Sabino Lopes foin lalais ne’e iha Kampus UNTL
Nia mós hato’o esperansa katak, atividade sira hanesan ne’e bele sai dalan ida atu dezenvolve kapasidade estudante sira, liuliu iha área jornalizmu. Nia hakarak haree iha futuru estudante sira bele hametin kooperasaun ho universidade privadu sira, atu aumenta esperiénsia no prepara a’an ba mundu servisu hanesan jornalista profisionál.
Iha Fatin hanesan, estudante Departamentu Comunicação Social, Faculdade Ciências Sociais no Polítika (FCSP), Universidade Nasionál Timor Lorosa’e (UNTL) Jefarina Amaral,katak expozisaun ne’e la’ós atividade foun, maibé sai ona atividade anual ne’ebé Departamentu Comunicação Social organiza atu fó espasu ba estudante sira atu hatudu sira-nia kapasidade.
“Atividade expozisaun ne’e kada tinan sempre realiza. Atividade ne’e sai hanesan meius ida atu estudante sira transforma sira-nia esperiénsia no kreatividade sai obra ne’ebé bele hatudu ba públiku,” hatete Jefarina Amaral.
Obra sira ne’ebé aprezenta iha expozisaun inklui fotojornalizmu, jornál parede, Talkshow no podcast. Enkuantu estudante sira-nia abilidade iha fotografia, hakerek, entrevista no produsaun kontéudu dijitál, ne’ebé sai parte importante iha dezenvolvimentu komunikasaun iha era teknolojia.
Jefarina mós hateten salienta, realiza atividade ne’e hetan apoiu husi dosente sira, parte relevante sira husi Universidade no alumni Departamentu Comunicação Social. Nia reforsa tan katak, objetivu prinsipál husi expozisaun ne’e mak atu hasa’e koñesimentu no abilidade estudante sira iha área teknolojia no prepara sira atu sai fotógrafo no jornalista ne’ebé iha kapasidade profisionál.
“Objetivu husi atividade ne’e mak atu habelar estudante sira-nia koñesimentu no abilidade iha área teknolojia, no prepara sira atu bele sai fotógrafo no hakerek-na’in ne’ebé diak iha mundu jornalizmu,” Nia afirma
Diretora Departamentu Comunicação Social, Profa Dra. Constância de Jesus, mós subliña katak expozisaun ne’e nu’udar atividade li’ur-kurrikulár ne’ebé iha papél importante atu prepara estudante sira enfrenta dezafiu iha mundu jornalizmu, liuliu iha era dijitál.
“Estudante sira tenki aprende no komprende saida mak sira aprende iha teoria, depois lori ba prátika. Labele iha surat tahan de’it, maibé tenki iha mós asaun,” dehan Profa. Dra. Constância de Jesus.
Nia esplika katak expozisaun ne’e hahú iha quinta-feira no sei kontinua to’o sábado, ho partisipasaun husi estudante UNTL no estudante sira husi universidade privadu, inklui Instituto de Ciências da Saúde (IOB), Universidade de Díli (UNDIL/UNCT, favor konfirma naran ofisiál) no Universidade Oriental Timor Lorosa’e (UNITAL).
Liuhusi atividade ne’e, estudante sira la’ós de’it hetan oportunidade atu hatudu sira-nia obra ba públiku, maibé mós atu hametin konfiansa, dezenvolve abilidade prátika no prepara an atu kontribui ba dezenvolvimentu komunikasaun no jornalizmu iha Timor-Leste.
Jornalista : Caryn Camões
Editor :Ana Maria da Silva
