(Díli), Bidau 20/10/2026 – Depois de tinan barak nia laran familia halo konfirmasaun ofisiál kona-ba identifikasaun ruin, ba saudoza Maria José Brites Boavida, ne’ebé koñesidu ho naran “Soimali”, ohin familia sira simu ofisialmente restu mortais hosi Komisaun Organizadora Conselho de Libertação Nacional (MACLN), liuhusi Departamentu Legal Forénsiku Hospital Nasionál Guido Valadares (HNGV).
Entrega restu mortais ne’e sai momentu importante ba família, ne’ebé kleur ona hein atu bele fó omenajen no despedida ikus ba sira-nia maun-alin no membru família ne’ebé luta ba libertasaun nasionál.
Tuir reprezentante delegasaun MACLN, Diogo Fraga, hatete katak entrega restu mortais ne’e ba família atu sira bele hala’o omenajen durante loron rua iha rezidénsia família nian, molok lori fila fali ba MACLN atu halo serimónia hakoi ho dignidade iha Jardim dos Heróis, Metinaro.
“Fatór rekoñesimentu hanesan polítika Governu nian ba restu mortais no veteranu sira, nia validasaun iha aspetu barak ida mak ba hakoi iha Jardim dos Heróis, Metinaro ba saudoza ‘Soimali’, ohin lori ona ba uma no sei entrega fila fali mai MACLN hodi hakoi ho dignidade iha Jardim dos Heróis, Metinaro,” hatete Diogo Fraga Bidau 20/10/2026.
Iha sorin seluk, Maria Madalena Brites Boavida, bin husi saudoza “Soimali” hatete katak família deskobre ruin ne’e iha tinan 2012, ho ajuda husi sasin ida ne’ebé iha tempu ne’ebá akompaña no haree diretamente momentu saudoza ne’e mate.
Nia esplika katak, depois família hetan ruin ne’e, sira marka, hili no lori ba servisu forénsiku atu halo identifikasaun iha tinan 2014, família simu informasaun kona-ba rezultadu identifikasaun ne’ebé hatudu katak ruin ne’ebé hetan ne’e inklui ruin hosi “Soimali” no “Maubrani”.
“Iha tempu ne’ebá, ruin ne’ebé hetan ami marka, hili no lori mai entrega ba forénsiku ami hetan fali relatóriu iha 2014 katak ruin ne’ebé identifika mak ‘Soimali’ no ‘Maubrani’. Sira promete atu fó relatóriu ofisiál atu família hatene, no semana kotuk mak família hetan relatóriu no rezultadu ofisiál,” hatete Maria Madalena Brites.
Simu relatóriu ofisiál ne’e sai pasu importante ba família atu bele kontinua prosesu despedida no fó omenajen ba saudoza “Soimali”, ne’ebé nia memória sei nafatin iha família no komunidade.
Tuir informasaun ne’ebé fó sai, serimónia hakoi restu mortais saudoza Maria José Brites Boavida “Soimali” sei hala’o iha loron 25 Outubru 2026, iha Semitériu Jardim dos Heróis, Metinaro.
Jornalista: Indária Soares/ Benilda dos Santos
Editor: Ana Maria da Silva
