(Dili), Caicoli, 07/10/2026)— Komisaun Anti-Korrupsaun (KAK) kuarta-feira (07/10) hala’o sensibilizasaun ba jornalista sira kona-ba Lei Númeru 7/2020, loron 28 Agostu, kona-ba Medida Prevensaun no Kombate Korrupsaun.
Iha atividade sensibilizasaun ne’e, jornalista na’in 40 partisipa, kompostu husi jornalista sira hosi Agência Noticiosa TATOLI, Institutu Públiku (TATOLI, IP), Rádio Televisão Timor-Leste, Empresa Públika (RTTL, EP), Timor Post, Independente, STL, GMN TV no média sira hosi plataforma seluk.
Objetivu husi sensibilizasaun ne’e mak atu hasa’e koñesimentu jornalista sira kona-ba papél KAK nian iha prevensaun korrupsaun, bazeia ba Lei Númeru 7/2020 kona-ba Medida Prevensaun no Kombate Korrupsaun (MPKK). Liuhusi atividade ne’e, KAK no média sira bele hamutuk kontribui ba esforsu prevensaun no kombate korrupsaun.
Tema sensibilizasaun ne’e mak “Hasa’e Koñesimentu no Kapasidade Jornalista sira hodi Kontribui ba Transparénsia, Integridade no Responsabilizasaun.”
Komisáriu Komisaun Anti-Korrupsaun, Rui Pereira dos Santos, hateten katak sensibilizasaun hanesan ne’e ba jornalista sira, foin dala rua mak hala’o, primeiru iha tinan 2015 no agora iha tinan 2026.
Nia hateten, sensibilizasaun ne’e importante atu hasa’e koñesimentu jornalista sira kona-ba servisu KAK nian, tuir kriasaun Lei KAK no Lei MPKK, inklui utilizasaun termu jurídiku sira.
“Jornalista sira nu’udar formandu iha sensibilizasaun durante loron ida ne’e, atu sira bele iha koñesimentu kona-ba setór justisa, matéria ne’ebé bele no labele publika, no presiza halo konfirmasaun ba fonte kredível sira iha asuntu prevensaun no kombate korrupsaun nian,” Komisáriu Rui hateten iha nia intervensaun bainhira loke sensibilizasaun Anti-Korrupsaun ba jornalista sira iha Timor-Leste.
Atividade ne’e hala’o iha Salaun Autoridade Munisípiu Dili, Matadouro, kuarta-feira ne’e.
Komisáriu Rui mos agradese ba konvite ne’ebé KAK fó sai ba média nasionál sira, ne’ebé kuaze hotu haruka jornalista sira atu partisipa iha formasaun loron tomak ne’e.
“KAK mesak, nia labele halo buat ida oinsá simu no partilla informasaun. Maibé, ita boot maluk média sira mak sai matan no tilun ba Komisaun Anti-Korrupsaun nian,” nia dehan.
Komisáriu Rui hateten katak odamatan KAK nian nakloke durante oras 24 ba jornalista sira atu hato’o keixa liuhusi WhatsApp ba investigador sira, no mos liuhusi sistema keixa online ne’ebé disponivel.
“Atu nune’e ita hotu-hotu hamutuk hodi prevene no kombate korrupsaun,” nia dehan.
Jornalista: Ana Maria da Silva
Editór : Felisberto F da Costa
