Inan Husi Vítima Violénsia Seksual husu Justisa, no La satisfeitu ho pena Prisaun Ne’ebe Arguidu Kumpre

‎‎(Dili), Largo lecidere 20/11/2026 – Inan ida husi vítima Suzana Josefa Pinto tilman Kona ba violénsia seksuál hato’o sentimentu triste no insatisfasaun kona-ba kumprimentu pena prizaun ba arguidu ne’ebé antes ne’e tribunál kondena ho pena prizaun tinan 15. Tuir nia informasaun, arguidu ne’e kumpre pena iha komarka durante tinan neen de’it antes hetan liberdade.

‎‎Inan vítima, Josefa keubete hatete katak nia antes buka apoiu husi defensór atu akompaña nia oan feto durante prosesu judisiál. Maibé, nia lamenta tanba durante prosesu ne’e família la hetan komunikasaun no informasaun klaru kona-ba progresu kazu husi defensór.

‎Nia esplika katak, tuir desizaun tribunál, arguidu hetan pena prizaun tinan 15 no multa US$500. Tanba ne’e, nia sente la komprende tanbasá arguidu bele sai husi komarka depois de kumpre pena tinan neen de’it.

‎“Hau hanesan inan husi vítima, husu ba justisa atu halo tuir lei. Bainhira tribunál fó pena prizaun tinan 15 ka tinan 20, hau hakarak pena ne’e kumpre duni. Hau la hakarak justisa ba hau-nia oan sai de’it liafuan iha papel, maibé tenke iha implementasaun,” hatete Vitima Nia Inan Josefa keubete iha Largo leciodere 20/11/2026.

‎Nia kontinua hato’o katak família sofre ona tanba kazu ne’e, no nia la satisfás ho situasaun ne’ebé arguidu hetan liberdade molok kumpre total pena ne’ebé tribunál determina.

‎“Hau la satisfás ho situasaun ne’e, tanba hau-nia oan mak sai vítima no família sofre ona. Hau husu ba autoridade kompetente atu fó esplikasaun klaru kona-ba tanbasá arguidu sai husi komarka sedu, maski tribunál determina pena prizaun tinan 15,” nia dehan.

‎‎Iha oportunidade ne’e, inan vítima husu ba Ministériu Públiku, Defensoria Públika no autoridade judisiária kompetente sira atu fó atensaun ba direitu vítima, garante asesu ba justisa no fó informasaun transparente ba família kona-ba prosesu judisiál no kumprimentu pena.

‎Nia espera katak autoridade kompetente sira bele fó resposta no esplikasaun klaru, atu família vítima komprende prosesu ne’ebé akontese no sente katak direitu vítima hetan protesaun tuir lei.

‎Jornalista: Ana Maria da Silva 

‎Editor: Manuel Andrade

‎