(Ainaro), Suku Horai-Quic 31/10/2026 – Ho espíritu solidariedade no responsabilidade hamutuk, komunidade Aldeia Gourema hamutuk ho autoridade aldeia hala’o servisu voluntáriu hodi taka no hadi’a estrada ne’ebé ko’ak, nu’udar preparasaun ba selebrasaun Loron Bo’ot Finadu.
Atividade ne’e hala’o iha dalan husi Grusamentu Rimori ba Aldeia Gourema, ne’ebé liga diretamente ho Postu Administrativu Hatu-Builico. Inisiativa ne’e iha objetivu atu fasilita asesu no garante seguransa ba komunidade, liuliu ba ema sira ne’ebé sei mai partisipa iha selebrasaun Loron Bo’ot Finadu.
Delegadu Aldeia Gourema, Moisés Mendonça, esplika katak servisu voluntáriu ne’e hala’o iha loron Sesta-Feira, tanba estrada ne’ebé iha kondisaun aat seidauk hetan hadi’ak husi programa dezenvolvimentu ne’ebé implementa iha aldeia.
Tuir Moisés, projetu ne’ebé implementa liuhusi Programa Nasionál Dezenvolvimentu Suku (PNDS) iha orsamentu limitadu, nune’e la konsege responde ba nesesidade atu hadi’a estrada tomak.
Nia mós hato’o preokupasaun kona-ba kondisaun estrada ne’e, tanba to’o agora dalan husi Grusamentu Rimori ba Aldeia Gourema sei iha kondisaun grave, maski autoridade aldeia submete ona relatóriu ba Ministériu Obras Públikas (MOP) iha tinan 2023.
“Komunidade maioria iha ne’e iha produtu oioin, maibé ami nia dalan seidauk di’ak atu fasilita movimentu no transporte. Se Governu bele haree, ami husu atu loke matan, haree no tau iha fuan nesesidade estrada ne’e,” dehan Moisés Mendonça iha suku horai -Quic 31/10/2026.
Nia hateten katak, iha tempu preparasaun ba Loron Bo’ot Finadu, estrada ne’ebé di’ak sai nesesidade importante atu fasilita amu selebrante sira atu bele to’o iha igreja no vizita semitériu, hodi hala’o misa no atividade relijioza hamutuk ho komunidade.
”Maski servisu ne’e hala’o ho rekursu limitadu, ami nafatin halo solidariedade hodi sai forsa prinsipál atu atividade bele lao. Ami mós fó kontribuisaun hanesan hahan no Be’e atu sustenta komunidade voluntáriu sira durante hala’o servisu”nia delklara
Moisés Mendonça hato’o agradese ba komunidade hotu ne’ebé partisipa no fó apoiu, tanba kontribuisaun ki’ik ka boot iha valor importante ba susesu atividade ne’e.
Iha oportunidade ne’e, nia apelu ba Governu, liuliu Ministériu Obras Públikas, atu fó atensaun no buka solusaun definitiva ba problema estrada ne’e, tanba dalan ne’e la’ós de’it importante ba selebrasaun Loron Bo’ot Finadu, maibé mós ba atividade ekonomia no movimentu loroloron komunidade Aldeia Gourema nian.
Jornalista : Inácio Silva
Editor :Manuel Andrade
