Díli, 15 Outubru 2026 (CCD) – Konsellu Imprensa (CI) hamutuk ho Sekretaria Estadu Komunikasaun Sosiál (SECOMS) loke ofisialmente Feira Loron Nasionál Liberdade Imprensa (LNLI) ba dala-haat, ho tema “Mídia Livre, Demokrasia Metin”.
Feira ne’e organiza atu selebra liberdade imprensa no reflete kona-ba papél mídia hametin demokrasia iha Timor-Leste.
Iha diskursu, Prezidente Konsellu Imprensa, António M. da C. M. Mali, haktuir liberdade imprensa nu’udar pilar fundamentál ida iha sistema demokrasia, tanba garante sidadaun sira-nia asesu ba informasaun loos no ekilibrada.
Nia enfatiza katak, imprensa livre no independente importante atu ajuda sidadaun sira akompaña no kontrola asaun husi ema sira ne’ebé kaer podér, nune’e bele foti desizaun bazeia ba informasaun ne’ebé loos.
“Jornalista sira tenke iha korajen atu buka verdade, verifika informasaun, deskobre faktu sira no hala’o sira-nia knaar ho independénsia, la tauk no la halo favoritizmu,” dehan António M. da C. M. Mali iha nia diskursu.
Iha parte seluk, Sekretáriu Estadu ba Komunikasaun Sosiál, Expedito L. D. Ximenes katak,jornalista sira iha papél importante atu buka, verifika no hato’o informasaun ba públiku. Nia mós subliña katak Governu no instituisaun públika sira iha responsabilidade atu kria no garante ambiente ne’ebé permite mídia hala’o sira-nia knaar ho independénsia, profesionalizmu no responsabilidade.
“Loron ida-ne’e la’ós de’it momentu atu komemora liberdade imprensa, maibé mós oportunidade atu ita hotu reflete kona-ba papél no responsabilidade mídia nian iha ita hamutuk harii nasaun ida-ne’e, hametin demokrasia, promove transparénsia no fó informasaun ne’ebé loos no kredível ba povu,” haktuir Expedito L. D. Ximenes.
Feira Loron Nasionál Liberdade Imprensa ne’e mós sai nu’udar espasu atu fahe esperiénsia, promove diálogu no hametin relasaun entre mídia no públiku. Liuhusi atividade ne’e, organizadór sira fó oportunidade ba komunidade atu komprende kle’an liután kontribuisaun mídia no komunikasaun sosiál nian ba prosesu dezenvolvimentu nasaun.
Tema “Mídia Livre, Demokrasia Metin” lori mensajen kona-ba importánsia liberdade imprensa, responsabilidade profisionál no asesu ba informasaun kredível nu’udar elementu fundamentál atu hametin demokrasia no promove transparénsia iha Timor-Leste.
Jornalista : Indária Soares Belo / Benilda
Editor :Manuel Andrade
