(Díli), Hudi Laran 20/10/2026 – Organizasaun Oxfam hala’o media briefing ba jornalista sira, hodi hasa’e koñesimentu no komprensaun kona-ba proposta Orsamentu Jerál Estadu (OJE) 2027, liuliu prioridade dezenvolvimentu ne’ebé afeta diretamente komunidade rurál no grupu vulnerável sira.
Iha atividade ne’e, jestór programa Oxfam, Zeca Nunes, husu Governu atu aumenta alokasaun orsamentu ba dezenvolvimentu kapitál, atu responde ba nesesidade komunidade rurál sira, liuliu iha área justisa klimátika, justisa ekonómika no justisa jéneru.
Zeca Nunes hateten katak organizasaun sivil iha papél importante atu monitoriza prestasaun servisu públiku, halo advokasia no fó rekomendasaun ba Governu, bazeia ba realidade no nesesidade ne’ebé komunidade sira enfrenta.
“Organizasaun sivil la’ós de’it atu kritika, maibé mós atu fó kontribuisaun konstrutiva ba Governu, liuhusi monitorizasaun, advokasia no rekomendasaun bazeia ba nesesidade povu nian,” Nunes jestór programa Oxfam, Zeca Nunes iha Hudi Laran 20/10/2026.
Nia mós esplika katak iha área justisa klimátika, komunidade rurál sira presiza hetan apoiu finanseiru adekuadu atu bele enfrenta impaktu mudansa klimátika. Enkuantu iha área justisa jéneru, Nunes enfatiza importánsia atu garante feto sira nia direitu ba rai, inklui asesu ba rejistu rai no kadastru.
Aleinde ne’e, organizasaun sivil sira rekomenda ba Ministériu Justisa atu kontinua halo sensibilizasaun kona-ba lei rai, atu komunidade sira komprende di’ak sira-nia direitu no obrigasaun. Iha área justisa ekonómika, oportunidade empregu ba juventude mós presiza sai prioridade iha planeamentu no alokasaun orsamentu.
Nunes konsidera katak falta oportunidade servisu ba joven sira bele kontribui ba pobreza no konflitu sosiál. Tanba ne’e, nia husu Governu atu aumenta investimentu iha infraestrutura públika, agrikultura, turizmu no setór produtivu sira seluk, hodi hametin ekonomia lokál no hadi’a komunidade rurál sira-nia moris.
Iha fatin hanesan partisipante xefe Redasaun Rádio Liberdade, Teodosia dos Reis, mós hateten katak media briefing ne’e sai oportunidade importante ba jornalista sira atu aprofunda koñesimentu kona-ba asuntu sosiál sira ne’ebé presiza hetan atensaun iha mídia.
“Media Briefing ne’e importante tebes atu ajuda jornalista sira hadi’a kualidade kobertura mídia nian, hodi sai sensível liután ba jéneru, inkluzivu no fó espasu ba grupu vulnerável sira atu sira-nia lian no esperiénsia bele hetan reprezentasaun iha notísia sira,” hatete xefe redasaun Teodosia dos Reis.
Nia aumenta katak, liuhusi atividade hanesan ne’e, jornalista sira bele hetan orientasaun kona-ba oinsá atu buka informasaun no halo pergunta ba autoridade governu sira, atu asuntu jéneru, direitu feto no labarik, no ema ho defisiénsia hetan kobertura ne’ebé adekuadu.
Liuhusi media briefing ne’e, Oxfam no organizasaun sivil sira hein katak jornalista sira bele sai hosi atividade ne’e ho komprensaun ne’ebé kle’an liután kona-ba prioridade OJE 2027 no nesesidade komunidade rurál sira, hodi kontribui ba kobertura notísia ne’ebé informativu, inkluzivu no fó atensaun ba realidade moris povu nian.
Ekipa: Media Mudansa
