(Dili), Caicoli, 07/10/2026 — Komisáriu Komisaun Anti-Korrupsaun (KAK), Rui Pereira dos Santos, hateten katak KAK informa ona ba Prezidente Repúblika José Ramos-Horta kona-ba situasaun ne’ebé Ministériu Públiku, liuhosi Prokuradór-Jerál Repúblika (PGR), Nelson de Carvalho, deside atu la delega fali kazu korrupsaun balu ba KAK atu kontinua halo investigasaun.
Rui Pereira hateten katak preokupasaun kona-ba situasaun ne’e KAK aprezenta ona ba Primeiru-Ministru liuhosi karta formál, haruka mós karta ba Parlamentu Nasionál (PN), no halo audiénsia ho deputadu sira.
“Alende ne’e, fulan rua liubá, Komisáriu KAK hasoru ona Prezidente Repúblika José Ramos-Horta hodi informa situasaun,” Rui Pereira hateten iha nia intervensaun bainhira abertura atividade sensibilizasaun kona-ba Lei Númeru 7/2020, 26 Agostu, kona-ba Medida Prevensaun no Kombate Korrupsaun ba jornalista sira, iha Salaun Administrasaun Munisipál Dili, kuarta-feira (07/10).
Nia hateten katak, iha enkontru ne’e, Prezidente Repúblika subliña katak Ministériu Públiku tenke konsidera no apresia kontribuisaun husi órgaun investigasaun kriminál sira ne’ebé durante ne’e ajuda ona iha prosesu kombate krime.
“Tuir lei, kazu korrupsaun bele delega ba KAK, la’ós limita eskluzivamente ba Polísia Sientífika Investigasaun Kriminál. Tanba ne’e, ha’u husu atu buka klarifikasaun kona-ba kompeténsia investigasaun korrupsaun no prosesu delegasaun kazu,” nia subliña.
Komisáriu Rui mós husu ba jornalista no media sira atu kontinua hala’o kontrolu sosiál hodi fó atensaun ba situasaun ne’e.
“Ami husu ba maluk media sira atu loke matan hodi haree situasaun ne’e,” nia afirma.
Rui Pereira hateten katak, bainhira Ministériu Públiku la delega fali kazu korrupsaun ba KAK, situasaun ne’e bele enfraquece servisu no kapasidade KAK nian iha kombate korrupsaun.
“Korruptór sira ne’e sira ba iha KAK mak tauk. Se KAK nia liman-ain tohar tiha ona no nehan mós la iha, korruptór sira bele halo atividade ne’e ho avontade. Situasaun ne’e bele hamate KAK nia kbi’it atu kombate korrupsaun, maski lei fó kompeténsia espesífika ba KAK,” nia lamenta.
Komisáriu KAK mós hateten katak iha kazu korrupsaun hamutuk 10 mak KAK remete ona ba Ministériu Públiku. Maibé, to’o agora, Ministériu Públiku seidauk delega fali kazu sira ne’e ba KAK atu kontinua halo investigasaun.
Nia hateten katak situasaun ne’e hahú ona desde tinan kotuk no to’o agora seidauk hetan solusaun. Tuir nia, iha kazu korrupsaun balu ne’ebé KAK halo ona averiguasaun besik tinan ida, maibé Ministériu Públiku seidauk halo redelegasaun ba KAK atu kontinua prosesu investigasaun.
Jornalista: Ana Maria da Silva
Editor : Felisberto F. Da Costa
