ANP Asegura Distribuisaun Kombustível Sei Normal Maski Estasaun Balun iha Díli Falta Gazolina

(Díli), Salaun gmn 18/11/2026 – Autoridade Nasionál Petróleu (ANP), hamutuk ho Ministériu Petróleu no Rekursu Minerál (MPRM), akompaña hela situasaun iha sentru abastesimentu kombustível balun iha kapitál Díli ne’ebé estoke mamuk, liuliu gazolina maski nune’e, ANP afirma katak distribuisaun kombustível sei kontinua ho normalidade, tanba iha koordenasaun di’ak ho empreza importadór rua, Esperansa Timor Oan (ETO) no Pertamina Internasional Timor (PITSA).

Prezidente ANP, Gualdino do Carmo da Silva, hatete katak monitorizasaun ne’ebé instituisaun ne’e hala’o identifika estasaun balun ne’ebé la iha stock kombustível, liuliu gazolina, to’o iha situasaun ne’ebé obriga estasaun balun taka temporariamente.

“Ami haree katak iha estasaun abastesimentu kombustível balun ne’ebé laiha kombustível, liuliu gazolina. Estasaun balun la konsege fó servisu hanesan baibain, no balun tenke taka temporariamente. Maibé, ami kontinua ko’alia ho operadór rua, ETO no PITSA, atu hatene problema ne’e iha ne’ebé,” hatete Prezidente ANP, Gualdino do Carmo da Silva iha Salaun Multiuzu 18/11/2026.

Maski nune’e, nia esplika katak, bazeia ba informasaun husi empreza importadór rua ne’e, seidauk iha mudansa signifikativa kona-ba volume kombustível ne’ebé tama ba Timor-Leste. Importasaun kombustível mós kontinua tuir prosesu normal.

Tanba ne’e, ANP agora dadaun buka hatene kauza prinsipál ne’ebé kontribui ba atrasu distribuisaun kombustível iha estasaun balun. Investigasaun ne’e inklui posibilidade problema tékniku ka kestaun kontratual entre operadór no distribuidór sira.

ANP mós kontinua hametin koordenasaun ho empreza importadór no entidade relevante sira, atu asegura katak abastesimentu kombustível ba konsumidór sira bele kontinua no situasaun iha merkadu la sai instável.

Instituisaun ne’e hein katak, liuhusi koordenasaun no identifikasaun ba kauza problema ne’e, distribuisaun kombustível iha estasaun sira bele fila fali ba normalidade iha tempu badak.

 

                       Jornalista: Madalena de Lima

                        Editor: Ana Maria da Silva