(Bobonaro), Ospitál Referál Maliana 14/11/2026 – Ospitál Referál Maliana kontinua fornese servisu saúde ho variedade especialidade médika ba komunidade iha Munisípiu Bobonaro maske iha médiku espesialista no servisu atendimentu iha nivel sekundáriu no terseáriu, ospitál ne’e sei hasoru dezafiu balu, inklui falta reagente laboratóriu, ekipamentu X-ray ne’ebé la funsiona, limitasaun ambulánsia no sala operasaun ne’ebé presiza espansaun.
Diretór Servisu Atendimentu Klíniku Ospitál Referál Maliana, Doutór Henrique Soares, esplika katak ospitál ne’e iha médiku espesialista interna, cirurgia, pediatria, neonatologia no cardiologia, aleinde médiku jerál na’in 25. Servisu neonatologia foka liu ba bebé foin moris to’o loron 28.
Nia hateten katak, maske ospitál iha profisionál saúde ho espesialidade oioin, falta médiku intensivista ne’ebé Ministériu Saúde aloka ona sai preokupasaun, tanba seidauk bele hala’o servisu. Atu responde ba pasiente kritiku, ospitál implementa hela unidade High Dependency Unit (HDU) ho kapasidade kama lima, no kontinua halo kolaborasaun entre médiku espesialista no enfermeiru intensivista.
Kona-ba disponibilidade ai-moruk, Henrique Soares informa katak stok ai-moruk iha ospitál atualmente atinje 2,4% husi total item 384 ne’ebé eziste. Bainhira ai-moruk esensiál balu la disponivel, ospitál buka alternativa ho ai-moruk seluk ne’ebé iha efeitu tratamentu hanesan.
“Nia mós hatutan katak hanesan captopril lae ami ba fali enalapril. Hanesan ne’e nia ai-moruk ne’e hanesan, dalaruma analgesic sira isin moras seda hanesan ibuprofen lae ami bele fo fali diclofenac, ka paracetamol. Ida ne’e hodi bele troka,” hatete Diretór Servisu Atendimentu Klíniku Ospitál Referál Maliana, Doutór Henrique Soares foin lalais ne’e.
Maske nune’e, la’ós ai-moruk hotu bele troka, tanba ai-moruk balu presiza tratamentu espesífiku. Ospitál kontinua halo pedidu ai-moruk tuir nesesidade, liuhusi INFM, inklui pedidu regular no emerjénsia.
Iha parte seluk ekipamentu diagnóstiku, problema reajente laboratóriu sai mós obstákulu ba atendimentu pasiente. Reagente importante balu, hanesan Hepatite B, teste dengue, hemograma no ionograma, seidauk disponivel durante períodu fulan tolu to’o fulan neen, depende ba tipu reagente.
Aleinde ne’e, ekipamentu X-ray mós la funsiona tanba falta reagente ka tinta ne’ebé uza ba ezaminasaun. Kondisaun ne’e halo pasiente sira ne’ebé presiza ezaminasaun diagnóstika, inklui vítima asidente tráfiku no pasiente ho trauma, tenke hetan referénsia ba Dili.
“X-ray aberia teunak baze básiku fulan tolu. Dehan ami parte direstaun servisu apoiu diagnóstico terapêutiku sira requiza tena ba nasional maibé hosi nasional maka problema kedas nabá. Entaun ita reagente la iha to’o agora sidauk iha solusaun,” hatutan Henrique Soares deklara.
Nia mós temi katak, pasiente ne’ebé sofre hemorragia cerebral ka trauma grave balu presiza halo ezaminasaun CT Scan, maibé fasilidade ne’e seidauk iha Maliana, nune’e presiza transfere ba Hospital Nacional Guido Valadares iha Dili atu hetan diagnóstiku no tratamentu apropriadu.
Dezafiu seluk mak fasilidade transporte ba pasiente. Atualmente, ospitál iha ambulánsia ida de’it, maibé ambulánsia ne’e hela iha Dili atu halo manutensaun. Tanba ne’e, Henrique konsidera katak ambulánsia ida seidauk la natoon atu responde ba nesesidade populasaun iha Munisípiu Bobonaro.
“Ho montante ba populasaun ne’ebé mak munisípiu Bobonaro ne’e iha ne’e ita la merese ambulánsia ida. Ne’e presiza tan ambulánsia rua tan atu bele atende lalais ba ema ne’ebe moras,” nia hateten.
Nia hein katak, ho aumentu ambulánsia rua tan, ospitál bele fasilita transferénsia ba pasiente emerjénsia sira ne’ebé presiza tratamentu iha ospitál ho fasilidade kompletu liu, liuliu iha Dili.
Iha área cirurgia, sala operasaun mós presiza espansaun atu bele atende pasiente barak iha tempu hanesan. Henrique Soares hateten katak, iha semana balu ospitál bele halo operasaun ba pasiente na’in sanulu ka liu, maibé limitasaun sala operasaun halo pasiente sira tenke hein to’o operasaun ida remata hafoin atende fali seluk.
“Dala ruma semana ida ne’e ami bele opera bele iha sanulu, sanulu resin maiebé dala ruma paciente mai barak hanesan ne’e ami la bele opera dala ida ami presiza hein operasaun ida hotu tiha maka ida kontinua fali,” nia esplika.
Aleinde sala operasaun, ospitál mós identifika nesesidade ekipamentu hemodialysis ba pasiente sira ne’ebé sofre moras renál no presiza tratamentu regular tanba seidauk iha fasilidade ne’e iha Maliana, pasiente balu tenke ba Dili atu halo hemodialysis, ne’ebé dala ruma obriga sira no família atu hela iha Dili.
Maibé, Henrique subliña katak implementasaun servisu hemodialysis la depende de’it ba ekipamentu, maibé presiza mós rekursu umanu espesialista iha área nefrologia atu garante tratamentu bele hala’o ho seguru no apropriadu.
Ho limitasaun iha rekursu umanu, ai-moruk, ekipamentu diagnóstiku no infraestrutura, Ospitál Referál Maliana kontinua husu apoiu husi Ministériu Saúde no Governu atu responde ba nesesidade hirak ne’e. Nia hein katak, ho melloramentu iha fasilidade no aumentu profisionál saúde, ospitál bele aumenta kapasidade atendimentu no garante komunidade iha Bobonaro hetan asesu ba servisu saúde ne’ebé di’ak liu.
Ekipa: Media Mudansa















