(Díli), Pantai kelapa 01/10/2026 – Preparasaun ba selebrasaun Loron Mundial HIV/SIDA 2026 Institutu Nasionál Kombate HIV/SIDA, Institutu Públiku (INCSIDA, I.P.) realiza enkontru hodi halo preparasaun, objetivu atu diskute planu atividade, fatin selebrasaun, tema nasionál no estratéjia envolvimentu parseiru sira no komunidade.
Enkontru ne’e lidera husi Prezidente INCSIDA, I.P., Daniel Marçal, hamutuk ho ekipa INCSIDA, reprezentante Ministériu Saúde, parseiru nasionál no internasionál, no entidade relevante sira.
Ba tinan 2026, selebrasaun Loron Mundial HIV/SIDA sei hala’o iha Munisípiu Bobonaro, liu-liu ho konsiderasaun ba situasaun HIV/SIDA iha munisípiu ne’e no nia pozisaun nu’udar área fronteira.
“Selebrasaun tinan ida-ne’e sei hala’o iha Munisípiu Bobonaro, tanba tuir dadus ne’ebé ami iha, kazu HIV/SIDA iha munisípiu refere konsidera aas liu depois Munisípiu Dili. Ami mós halo ona enkontru ho autoridade iha fronteira atu haree hamutuk preparasaun ba Loron Mundial HIV/SIDA, ho objetivu atu fasilita komunidade sira hetan informasaun importante kona-ba HIV/SIDA,” dehan Prezidente INCSIDA, I.P., Daniel Marçal iha Pantai Kelapa 01/10/2026.
Segundo nia, preparasaun ne’e sai nu’udar pasu inisiál atu asegura katak selebrasaun Loron Mundial HIV/SIDA la’ós de’it atividade komemorativu, maibé mós sai oportunidade atu aproxima informasaun kona-ba HIV/SIDA ba komunidade, liu-liu iha área fronteira.
INCSIDA planeia organiza atividade oin-oin no atrativu atu aumenta partisipasaun públiku atividade hirak ne’e sei fó espasu ba komunidade atu hetan informasaun no komprensaun kona-ba prevensaun, tratamentu no esforsu kombate HIV/SIDA.
Tuir planu inisiál ne’ebé diskute ona, atividade sei inklui kampaña edukasaun kona-ba HIV/SIDA, semináriu, kompetisaun dada tali entre suku, tratamentu masál, teste HIV gratuitu no doasaun ran.
Através atividade sira-ne’e, INCSIDA espera bele hametin tan konsiensia públika kona-ba HIV/SIDA no promove partisipasaun komunidade iha esforsu prevensaun no tratamentu.
Aleinde ne’e mós parte saúde, mensajen kona-ba stigma no diskriminasaun hasoru ema ne’ebé moris ho HIV mós sei sai parte importante husi kampaña Loron Mundial HIV/SIDA tinan ida-ne’e.
Daniel Marçal apela ba komunidade atu evita atitude sira ne’ebé bele hamosu stigma no diskriminasaun hasoru ema ne’ebé moris ho HIV, tanba situasaun hirak ne’e bele sai obstákulu ba sira atu buka servisu saúde, asesu ba tratamentu no kontinua tratamentu ne’ebé presiza.
Preparasaun ba selebrasaun sei kontinua ho koordinasaun entre INCSIDA, Ministériu Saúde, autoridade lokal, parseiru nasionál no internasionál, no entidade relevante sira seluk.
Loron Mundial HIV/SIDA sei selebra kada tinan iha 1 Dezembru iha mundu tomak. Data ne’e sai oportunidade atu hasa’e konsiensia públika kona-ba HIV/SIDA, fó omenajen ba ema sira ne’ebé lakon sira-nia vida tanba SIDA, no rekoñese progresu ne’ebé hetan ona iha esforsu globál atu kombate HIV/SIDA.
Jornalista: Madalena de Lima
Editor: Ana Maria da Silva
