(Díli), Farmoza 24/09/2026 – Jogu amizade entre Forças Armadas Austrália no Forças de Defesa de Timor-Leste (F-FDTL) la’ós de’it atividade desportiva, maibé mós sai momentu importante atu hametin relasaun amizade, solidariedade no memória istórika entre Timor-Leste no Austrália.
Atividade desportiva ne’e liga ho memória kona-ba prezensa no misaun forsa internasionál INTERFET iha Timor-Leste iha tinan 1999, liu-liu hafoin referendu independénsia iha 30 Agostu 1999, bainhira país enfrenta turbulénsia no violénsia.
Iha eventu ne’e, Taça Xanana-Cosgrove sai hanesan parte hosi atividade komemorativu ba data 20 Setembru 1999 no kontribuisaun INTERFET ba esforsu estabilizasaun no kriasaun ambiente dame iha Timor-Leste.
Iha diskursu, Reprejentante Xefe Estadu Maior Jeneral F-FDTL Koronel Marcelino Ximenes RIZAI subliña katak rekoñesimentu ba kontribuisaun forsa sira ne’ebé integra iha INTERFET sei nafatin iha memória ema Timor-Leste.
Relasaun entre Timor-Leste no Austrália, ne’ebé dezenvolve durante tinan sira, mos kontinua hametin liu-husi kooperasaun no atividade hamutuk, inklui iha área desportiva.
“Relasaun hirak-ne’e foin lalais hatudu liu-husi realizasaun kompetisaun rua, feminina no maskulina, ne’ebé ita bele asiste.”hatete Reprejentante Xefe Estadu Maior Jeneral F-FDTL Koronel Marcelino Ximenes RIZAI iha Farmoza 24/09/2026.
Iha eventu ne’e, prezensa Excelentísimu Brigadeiru-Jenerál Rob Haertsch, Komandante Brigada Austrália, konsidera hanesan reprezentasaun ba Austrália no ema hotu ne’ebé partisipa iha misaun INTERFET.
Hanesan parte husi atividade, jogu futebool entre veteranu Falintil no veteranu INTERFET Austrália mós sai oportunidade atu fahe esperiénsia, relembrá memória istórika no hametin camaradagem entre veteranu husi nasaun rua.
Iha fatin hanesan trenador Natalino Marques hatete katak jogu amizade ne’e importante atu hametin relasaun entre Timor-Leste no Austrália, liu-husi memória istórika ne’ebé liga nasaun rua durante períodu INTERFET.
“Jogu amizade entre veteranu Falintil no veteranu INTERFET Austrália sei sai nu’udar momentu importante atu hametin relasaun amizade entre Timor-Leste no Austrália,” hatete Trenador Natalino Marques.
Atividade ne’e organiza ho objetivu atu selebra istória INTERFET no hamenus distánsia entre membru veteranu husi Timor-Leste no Austrália, liu-husi espórte, amizade no respeitu mútu.
Ba ekipa veteranu Falintil, preparasaun ba jogu hasoru limitasaun tempu no ekipamentu, tanba maioria membru sira sei iha responsabilidade servisu maski nune’e, ekipa kontinua trenu dala rua kada semana.
“Ita la iha espesialidade preparasaun barak, tanba limitasaun tempu no ekipamentu. Maibé, ami halo treinamentu rua iha semana, atu prepara ekipa no hadi’a kondisaun jogadór sira,” nia hatutan.
Nia esplika katak ekipa Timor-Leste sei enfrenta veteranu Austrália iha jogu amizade ne’ebé sei realiza iha Brisbane, Austrália, iha fulan oin dia 07 no Jogu ne’e sei sai oportunidade atu komemora istória INTERFET no hametin amizade entre veteranu husi nasaun rua.
Maski iha dezafiu kona-ba disponibilidade jogadór, inklui jogadór prinsipál balun ne’ebé la bele partisipa tanba kompromisu formasaun, preparasaun ekipa kontinua tuir kapasidade ne’ebé iha.
Iha sorin seluk, Alferes Bakhita Correia hatete katak jogu futebool ne’e la’ós de’it kona-ba kompetisaun, maibé mós importante ba promosaun espírito desportivu no preservasaun memória istórika.
“Partida futebol entre Forças Armadas Australianas no Forças de Defesa de Timor-Leste la’ós de’it atividade desportiva, maibé mós sai oportunidade atu hametin amizade, solidariedade no memória istórika entre nasaun rua,” hatete Alferes Bakhita Correia.
Iha partida ne’e, ekipa Forças Australianas no F-FDTL hatudu kompetisaun ne’ebé equilibradu, ho jogadór husi ekipa rua ne’ebé hatudu kapasidade no preparasaun téknika rezultadu final partida termina ho empate.
Maske nune’e, atividade ne’e konsidera mós hanesan oportunidade ba ekipa F-FDTL atu avalia kapasidade no identifika aspetu sira ne’ebé presiza hadi’a ba kompetisaun sira tuir mai.
Koordenadór ka treinadór F-FDTL hatete katak ekipa sei kontinua halo avaliasaun ba aspetu tékniku, ekipamentu no preparasaun atleta sira.
“Ita presiza kontinua treinu no halo preparasaun ho máximu la’ós de’it foka ba jogadór ida, maibé atleta hotu-hotu tenke komprende misaun no responsabilidade ne’ebé iha liu husi treinamentu hamutuk ho treinadór no ekipa, ita bele hadi’a kapasidade no prontidaun,” hatete treinadór F-FDTL.
Iha remata, atividade desportiva ne’e la’ós de’it fó espasu ba kompetisaun, maibé mós sai meiu atu relembrá istória, fahe esperiénsia no promove unidade, respeitu no amizade entre Forças Australianas no F-FDTL.
Ekipa: Media Mudansa
