(DILÍ), Caicoli 19/05/2026 – Iha dalan ninin área Caicoli nian, Paul Barreto, ho idade 70 husi Posto Administrativo Quelicai, Munisípiu Baucau, loro-loron tu’ur ho sigaru no SDSB hodi hein kliente sira mai sosa, maski idade avansadu ona, maibé nia kontinua halo negósiu ki’ik ne’e atu bele sustenta família no asegura oan sira nia edukasaun.
Nia mós hatete katak negósiu ki’ik ne’e sai hanesan dalan ida ba nia atu hetan rendimentu loro-loron, maski osan ne’ebé nia hetan la bo’ot, maibé nia nafatin esforsu hodi fa’an, loron ida nia hetan netik dolar amerikanu $7 to’o $16.
“Ha’u halo negosiu fa’an sigaru atu bele hetan osan hodi sustenta ba nesesidade uma laran no mós bele selu fali ha’u nia oan sira bele asesu ba iha edukasaun,” dehan Paul Barreto ba jornalista iha Caicoli, 19/05/2026
Paul konta katak faan sasan iha dalan ninin lafasil ba maibé nafatin ho esforsu hodi hahú halo negósiu ne’e husi tinan 2006 maibé tanba situasaun krize iha tempu ne’ebá, nia obriga hapara halo negósiu ne’e maibé temporariamente to’o 2007 depois nia kontinua fila fali halo negósiu to’o agora.
Maski nune’e nia servisu loro-loron hodi buka osan, no rendimentu ne’ebé nia hetan seidauk sufisiente atu sustenta ba familia no Paul mós iha oan nain hitu, nain ha’at kontinua estudu iha universidade, nain rua iha eskola sekundária, no ida forma ona uma kain.
“Tamba osan ne’ebé ha’u hetan menus tebes, difísil tebes atu suporta presiza uma laran no mos eskola ba ha’u nia oan sira,” nia hateten ho lian triste.
Alémde ne’e mós nia dehan luta ba ekonomia, nia mos enfrenta provasaun seluk iha nia moris, husi nia oan feto sofre moras mental durante tinan 10 resin, no to’o agora seidauk hetan tratamentu ne’ebé diak ba nia oan feto
Nia dehan katak durante tinan hirak ne’e, nia esforsu ona buka tratamentu iha fatin oioin, inklui sosa aimoruk husi Kupang no Atambua, maibé kondisaun nia oan seidauk di’ak.
“Ha’u buka ona aimoruk barak, maibé moras ne’e sei nafatin bainhira moras ne’e atake iha kualker tempu, monu no la iha aimoruk ne’ebé bele kura totál,” nia esplika.
Paul mós akresenta katak governu liu husi servisu saúde fó ona apoiu ba nia oan, inklui tratamentu iha Hospital Vera Cruz no fatin saude seluk maibe ha’u nia oan feto seidauk rekopera fila fali nia moras .
Paul mos husu ba parte relevante sira atu fó atensaun liu tan ba ema sira ne’ebé sofre moras mental, liu-liu ba nia oan ne’ebé agora dadaun hela iha sofrimentu ne’ebé naruk tebes.
Jornalista Estajiária : Caryn Camões / Bietriz
Editor : Ana Maria da Silva
