(Díli), Largo Lecidere, 29/07/2026 – Iha tempu feriadu ne’ebé estudante barak aproveita tempu feriadu atu deskansa ka halimar, Jonasio Da Silva, estudante klase 7.º ano iha EBF Hera ho idade tinan 15, hili atu uza nia tempu ho maneira produtiva durante feriadu, nia hela hamutuk ho família iha Taibesi no fa’an sasan hanesan tabaku, fore rai no aifuan sira seluk hodi ajuda sustenta nesesidade loron-loron família nian.
Kada loron, Jonasio lao ain husi Merkadu Taibesi ba fatin oin-oin iha kapitál, hanesan Largo Lecidere, Liceu, Palásiu Governu nia oin no Jardín 5 de Maio, no nia hili atu lao ain tanba bele hasoru no atrai konsumidór barak liu durante iha dalan ninin.
“Ha’u mai fa’an sasan iha fatin hirak-ne’e dala barak ona ha’u sai husi Merkadu Taibesi mai ho lao ain tanba iha ema balun presiza hola hau nia sasan iha dalan se ha’u uza transporte, dalaruma sasan ne’ebé ha’u lori sei la to’o ba ema barak,” hateten Jonasio Da Silva iha Largo Lecidere, 29/07/2026
Maske atividade ne’e presiza esforsu bo’ot, Jonasio kontinua servisu ho determinasaun atu hetan rendimentu ne’ebé bele ajuda família no prepara ba nesesidade eskolár sira nia esplika rendimentu kada loron la hanesan, tanba depende ba númeru konsumidór ne’ebé sosa nia produtu.
“Bainhira sorte di’ak, loron ida ha’u bele hetan entre 10 to’o 15 dólares. Maibé iha tempu balun, kuandu ema la sosa barak, hau hetan de’it 2 to’o 5 dólares kada loron,” nia dehan.
Ba Jonasio, atividade ida-ne’e la’ós de’it fonte rendimentu, maibé mós oportunidade atu aprende valor servisu, disciplina no responsabilidade desde idade ki’ik nia sente kontente tanba bele kontribui ba família no aprende experiênsia importante ba futuru.
“Maske rendimentu la bo’ot, hau kontente tanba bele ajuda família no aprende servisu no responsabilidade,” nia hatutan.
Istória Jonasio Da Silva sai ezemplu positivu ba juventude sira seluk katak tempu feriadu bele uza la’ós de’it ba deskansa, maibé mós atu dezenvolve abilidade foun, aprende negósiu no kontribui ba bem-estar família ho idade tinan 15 de’it, nia hatudu katak responsabilidade, perseveransa no vontade atu servisu maka valores importante ne’ebé bele ajuda ema ida atinje nia objetivu sira iha futuru.
“Maske sei estudante no rendimentu la bo’ot, Jonasio Da Silva aproveita tempu feriadu atu fa’an sasan, aprende responsabilidade no ajuda sustenta família.” Nia hakotu
Jornalista: Domingas / Ostelina
Editora: Ana Maria
