(Díli), Komoro-28/07/2026– hafoin tuir eventu Boxing Holywins Sport Show (HSS Fight Night Vol. 9) iha Bali-Indonesia ne’ebe hatudu resultadu positivu, hafoin boxista Timoroan nain 3 ne’ebe kompostu husi boxista Delio,Daniel no Alcino, hasoru sira nia adversariu husi nasaun Indonesia no sai kampionatu ba jogu refere maske boxista Timoroan sira seluk lakon. Hafoin Boxista nain (2) Delio no Daniel fila husi Indonesia mai Timor-Leste ho aviaun Aero Díli,enkuantu Povu Timor-Leste entusiasmu simu boxista nain (2) iha entrada Aeroporto Internasional Nicolau Lobato Díli nakonu ho emosaun no ksolok boot iha.
Iha biban nee, Ana dos Santos Belo, nudar reprezentante husi família, hato’o ninia agradesimentu klean ba ema hotu nia apoiu no hanoin hikas fali prosesu naruk ne’ebe atleta boxista sira liu ona. Nia parte rekoñese, dalan neebe sira hakat la’os buat neebe kmaan.
“Delio ho Daniel nia susesu nee ba ita hotu. Nia prosesu no progresu nia lala’ok mak nee bo’ot no todan tebes neebe sira hasoru durante nee. Sira-nia preparasaun máximu no disiplina, respeitu, konsiderasaun, no morál, buat sira nee mak orasaun lubuk boot ida,” dehan Ana dos Santos Belo ho laran kontenti hafoin simu Boxista nain (2) iha AeroPorto Internasional Nicolau Lobato Díli.
Ana mós haktuir,susesu nee la ses husi tulun orasaun husi Padre, Madre, no mós kontribuisaun husi maluk Timor-oan sira hotu. Família promete katak sei kontinua akompaña nafatin atleta sira-nia kareira hodi hakat ba oin. Nia mos hato’o ba Governu atu tau atensaun ba atleta boxista sira iha Timor-Leste.
“Rekomenda ba Governu atu fasilita no tau matan alin amador sira neebe tuir mai, tanba ita-nia boxsista mós barak ona” nia rekomenda
Enkunatu, ema hotu haree Delio no Daniel inklui ho Boxista sira seluk nia susesu hanesan matadalan bo’ot ida, no sai hanesan naroman ba jerasaun boxista sira neebe tuir mai,Governu tentki hare bainhira dezempeñu atleta sira nian iha palku internasionál tenki fó apoiu.
“Kontenti tebes wainhira hamriik iha neebá la lori pesoál nia naran, maibe hamriik iha rin nia leten ho bandeira RDTL ba ita-nia rai doben Timor-Leste,” tenik Ana Belo.
Iha fatin hanesan Boxista Delio Anzaqeci Mouzinho deklara,ho fuan no aten-brani,disciplina mak realidade dudu sira atu serbisu maka’as no hatudu resultadu ne’ebe iha.
“Ami-nia prosesu liu husi ami-nia promotor neebe mak ami uza, ohin loron ita selebra ida nee. Ami-nia hakarak, buat hotu hatudu ba públiku, ida nee mak realidade ba moris ida nee no ida nee be ami hala’o. Ami sente kontenti ema hotu mai iha nee, halibur iha nee. Ida nee mak povu nia hakarak no ita-nia hakarak neebe agora ita halo rame ba ita-nia rai,” dehan Delio Anzaqeci Mouzinho ho espresaun kontente.
Eventu Boxing Holywins Sport Show (HSS Fight Night Vol. 9) iha Bali-Indonesia iha loron 26 fulan jullu tinan 2026 ne’ebe ho spesifiku tebe hatudu husi Indonesia Versus Timor-Leste ho resultadu positivu nasaun Timor-Leste lidera pontu 3 no mos nasaun Indonesia lidera 3 husi jogu ne’e, enkuantu Boxista Timor-Leste kompostu husi Delio,Daniel,Elisio,Ozzy,Alcino no Tito ne’ebe mai husi Boxing Club ne’ebe diferente maibe husi Boxista sira ne’e hatudu resultadu jogu diak husi Boxista Delio,Daniel no Alcino ne’ebe hadau pontu husi sira nia adversariu maske boxista nain (3) seluk la sai manan nain iha eventu refere.
Jornalista/Estajiada :Natália/Melania
Editor :Ana Maria
