(Díli), Largo Lecidere, 23/07/2026 –Mehi ne’ebe bo’ot ba Desportivu labarik no joven Timor-Leste nian, liu-liu iha modalidade futeból no boksing, hetan tan naroman foun liuhusi kooperasaun no amizade entre Timor-Leste no Repúblika Populár Xina. Apoiu ida-ne’e hatudu liuhusi entrega ekipamentu desportivu oioin ba Ministériu Juventude, Desportu, Arte no Kultura (MJDAC), ne’ebé sei uza hodi apoia dezenvolvimentu desportu iha Timor-Leste.
Ministru Juventude, Desportu, Arte no Kultura, Nélio Isac Sarmento, simu ekipamentu desportivu sira-ne’e husi Embaixadora Repúblika Populár Xina iha Timor-Leste, Wang Wenli, iha sorumutu ne’ebé nakonu ho espíritu amizade no kooperasaun entre nasaun rua.
Apoiu ne’ebé mai liu-husi kooperasaun ho provínsia ida iha Xina ne’e la’ós de’it lori materiál fíziku, maibé mós lori esperansa foun ba labarik no joven sira ne’ebé iha interese no talentu iha área desportu husi bola futeból to’o ring boksing, ekipamentu sira-ne’e sei sai instrumentu importante hodi ajuda treinadór no atleta sira dezenvolve kapasidade no talentu desportivu.
“Ami prontu apoia desportu ho Governu Xina liu-husi provínsia ida ekipamentu sira-ne’e barak liu atu fó apoiu ba grupu labarik no joven sira ne’ebé foti parte iha desportu, liu-liu futeból iha mós ekipamentu ne’ebé uza ba treinu, ring boksing, no fasilidade ho materiál sira ne’ebé treinadór sira presiza hodi analiza no prepara atleta sira ba futuru,” dehan Ministru Nélio Isaac Sarmento iha Largo Lecidere, 23/07/2026.
Ba Governu Timor-Leste, apoiu ida-ne’e la’ós kona-ba kuantidade ekipamentu ne’ebé simu de’it, maibé mós kona-ba espíritu amizade no vizaun hamutuk hodi harii jerasaun foun ne’ebé iha saúde di’ak, kapasidade fízika no talentu desportivu.
“Apoiu ida-ne’e la’ós hare de’it ba kuantidade ne’ebé barak, maibé oinsá mak intensaun husi Governu Xina atu apoia ita-nia dezenvolvimentu desportu, inklui kompromisu atu ajuda Timor-Leste kria fasilidade ne’ebé adekuadu ba ita, joven desportista sira, no ba ita-nia jerasaun foun. Lori ita hotu nia naran, ha’u hakarak hato’o agradesimentu ba Embaixada Xina,” nia hatutan
Iha sorumutu ne’ebé reforsa amizade entre nasaun rua, Embaixadora Wang Wenli hateten katak desportu no kultura sai nudar odamatan importante hodi habelun liután relasaun entre povu Xina no Timor-Leste nia mós subliña katak komunikasaun ne’ebé di’ak no kooperasaun metin entre nasaun rua sei sai xave hodi promove dezenvolvimentu iha futuru, inklui iha área desportu.
“Xina no Timor-Leste nudar rai belun ne’ebé iha kooperasaun metin iha área kultura no desportu ita tenke hala’o komunikasaun ne’ebé di’ak entre Governu Xina ho Governu Timor-Leste. Ha’u iha ne’e mós atu nune’e ita iha pozisaun no futuru ne’ebé di’ak iha kompetisaun no desportu hanesan boksing ami hadomi Timor-Leste,” afirma Embaixadora Wang Wenli ho laran-metin.
Apoiu ekipamentu desportivu ida-ne’e espera bele fó kontribuisaun ba dezenvolvimentu desportu iha Timor-Leste, no sai motivasaun ba labarik no joven sira atu kontinua dezenvolve sira-nia talentu, hametin kapasidade no prepara-an hodi reprezenta Timor-Leste iha kompetisaun desportivu iha nivel nasional no internasionál.
Jornalista/Estajiada : Natália/Melania
Editor : Ana Maria
