(Díli), Aeroportu Nicolau Lobato 29/07/2026 – Atleta Timor-Leste nain haat, mak Alcino, Aromi, Tito no Ozzy, ne’ebé reprezenta Timor-Leste liu-husi Club Revolta, OBC no Maubere Puro iha kompetisaun internasionál, fila ona mai Timor-Leste no to’o iha Aeroportu Internasionál Presidente Nicolau Lobato, Díli, ho aviaun Citilink.
Fila mai atleta sira ne’e sai momentu importante ida ba komunidade desportiva Timor-Leste, tanba sira konsege hatudu espírutu patriotizmu, disiplina no determinasaun aas durante kompetisaun iha estranjeiru família, kolega, adepta desportu no komunidade balun marka prezensa iha aeroportu hodi simu no fó boas-vindas ba atleta sira.
Durante kompetisaun, Alcino, Aromi, Tito no Ozzy hatudu kapasidade no korajen atu hasoru atleta sira husi nasaun oin-oin maske rezultadu kompetisaun la hanesan ba atleta ida-idak, sira hotu lori naran Timor-Leste ba palku internasionál no fó orgullu ba povu Timor-Leste.
Reprezentante husi Club Revolta, OBC no Maubere Puro hateten katak esperiénsia ne’ebé atleta sira hetan iha kompetisaun internasionál sei sai valór bo’ot ida ba sira nia preparasaun iha futuru.
“Ami hakarak agradese ba povu Timor-Leste tomak ne’ebé fó apoiu moral ba atleta sira durante kompetisaun apoiu husi komunidade fó forsa ba ami atu kontinua treina no prepara an di’ak liu tan hodi lori naran Timor-Leste ba palku internasionál,” dehan reprezentante klub sira.
Nia hatutan katak resepsaun ne’ebé komunidade halo iha aeroportu hatudu katak povu Timor-Leste apresia sakrifísiu no dedikasaun atleta sira ne’ebé luta atu defende bandeira nasional iha kompetisaun internasionál.
Fila mai atleta sira la’ós de’it sinal ba remata kompetisaun, maibé mos sai símbolu ida ba progresu no dezenvolvimentu desportu kombate iha Timor-Leste apoiu husi komunidade no adepta desportu sei sai motivasaun bo’ot ba atleta sira atu kontinua hasa’e prestasaun no prepara an ba kompetisaun internasionál sira seluk iha futuru.
Jornalista/Estajiada: Josefina Maria / Natalia de Carvalho
Editor: Ana Maria
