(Díli), Lecidere, 21/07/2026 – Revolta Boxing Club hala’o konferénsia imprensa iha edifísiu Ministériu Juventude, Desportu, Arte no Kultura (MJDAC) hodi introdús ofisial atleta boxing Timor-Leste nain neen ne’ebé sei reprezenta nasaun iha kompetisaun internasionál Holywings Sport Show (HSS) iha Bali, Indonézia atividade ne’e mós sai oportunidade ida atu fó sai informasaun kona-ba preparasaun atleta sira no husu apoiu husi povu Timor-Leste.
Iha konferénsia imprensa ne’e, atleta sira, treinadór no organizadór sira esplika katak preparasaun ba kompetisaun HSS hala’o durante fulan balu, liu-husi treinu físiku, tékniku, tátiku no preparasaun mentál, atu asegura atleta sira bele kompete ho di’ak iha nivel internasionál.
Ministru Juventude, Desportu, Arte no Kultura, Nelyo Isac Sarmento, iha nia intervensaun, hateten katak Governu, liu-husi MJDAC, kontinua komprometidu atu fó apoiu ba dezenvolvimentu desportu nasional no insentiva atleta sira atu hametin disiplina, espiritu kompetisaun no patriotismu.
“Atleta sira ne’e la’ós deit reprezenta an rasik ka klub, maibé lori naran Timor-Leste ba palku internasionál. Governu sei kontinua buka dalan atu fó apoiu ba juventude no atleta sira atu bele dezenvolve sira nia kapasidade no lori prestíjiu ba nasaun,” hatete Ministru Nelyo Isac Sarmento iha salaun MJDAC 21/07/2026.
Prezidente Revolta Boxing Club hateten konferénsia imprensa ne’e importante atu fó informasaun ba públiku kona-ba preparasaun atleta sira no hamosu konfiansa husi komunidade molok delegasaun ba partisipa iha HSS Bali.
“Ami organiza konferénsia imprensa ida-ne’e atu introdús atleta sira ba povu Timor-Leste, esplika preparasaun ne’ebé ami halo no husu apoiu no orasaun husi ema hotu. Apoiu morál husi povu sei sai forsa boot ba atleta sira bainhira sira sae ba ring internasionál,” dehan reprezentante Revolta Boxing Club.
Atleta boxing Timor-Leste, Delio Anzaqeci Mouzinho, mós hateten katak nia ho kolega atleta sira sente orgullu tanba simu fiar atu reprezenta Timor-Leste iha kompetisaun internasionál nia asegura katak preparasaun ne’ebé hala’o durante ne’e aumenta sira nia konfiansa atu hasoru adversáriu sira.
“Ami treina ho seriedade no disiplina durante tempu naruk ami hatene kompetisaun ne’e la fasil, maibé ami prontu atu fó rezultadu di’ak liu ba Timor-Leste ami husu deit apoiu no orasaun husi povu hotu atu ami bele lori rezultadu ne’ebé di’ak ba nasaun,” hatete Delio Anzaqeci Mouzinho.
Holywings Sport Show (HSS), Xander Serrano Ceo, hatutan husi Indonézia, mós apresia partisipasaun Timor-Leste iha kompetisaun ne’e tuir nia, prezensa atleta Timor-Leste hatudu katak desportu boxing iha rejiaun kontinua dezenvolve no bele hametin amizade no kooperasaun entre nasaun sira.
“Holywings Sport Show la’ós deit kompetisaun boxing, maibé mós plataforma ida atu fó oportunidade ba atleta sira husi nasaun oin-oin atu hatudu sira nia talent ami kontente simu atleta Timor-Leste no hein atu haree kompetisaun ne’ebé emosiona iha Bali,” dehan Xander Serrano.
Kompetisaun Holywings Sport Show (HSS) sei realiza iha Bali, Indonézia, ho partisipasaun atleta boxing profisionál no semi-profisionál husi nasaun oin-oin partisipasaun Timor-Leste iha eventu ne’e espera bele aumenta esperiénsia atleta sira no loke oportunidade ba sira atu kompete iha nivel internasionál iha futuru.
Organizadór sira konfiante ho preparasaun ne’ebé metin, apoiu husi Governu no komunidade, atleta Timor-Leste sei bele hatudu prestasaun ne’ebé dignu no lori orgullu ba nasaun iha ring internasionál.
Jornalista/Estajiada: Josefina Maria
Editor: Ana Maria
