(Díli), Aimutin ETDA 03/09/2026– Timor-Leste — Fórum ONG Timor-Leste (FONGTIL) realiza formasaun ba rádio komunidade no media online kona-ba produsaun rádio no jornalizmu komunitáriu. Ho objetivu atu reforsa kapasidade média lokal no sosiedade sivíl iha área komunikasaun, produsaun konteudu no jornalizmu ne’ebé bazeia ba nesesidade komunidade.
Diretor Ezekutivu FONGTIL, Inocêncio de Jesus Xavier, hatete projetu ne’e hanesan aposta ida atu reforsa kapasidade sosiedade sivíl, liuliu iha produsaun kontentu no partisipasaun komunidade. Projetu ne’e sei hala’o husi tinan 2025 to’o 2028, ho planu atu produz kontentu hamutuk 36 produsaun durante períodu projetu.
“Projetu ida-ne’e aposta atu reforsa sosiedade sivíl sira nia produsaun 36 durante tinan 2025 to’o 2028. Iha fulan Outubru, ita sei aposta iha munisípiu haat, tuir rezultadu servisu sira ne’ebé ita planeia no halo hamutuk ho FONGTIL iha munisípiu sira,” hateten Inocêncio de Jesus Xavier ba jornalista sira hafoin formasaun foin lalais ne’e.
Nia esplika katak, antes implementa atividade sira ne’e,FONGTIL sei halo prosesu planeamentu no diskusaun hamutuk ho parseiru sira atu haree nesesidade no rezultadu servisu iha munisípiu sira. Atividade sira ne’e mos hetan apoiu finanseiru husi Uniaun Europeia, ne’ebé fo apoiu ba implementasaun atividade durante períodu tinan tolu.
Nia hatutan,projetu ne’e fó prioridade ba inklusaun sosial, liuliu partisipasaun feto, ema ho defisiénsia no komunidade sira iha área remotas.
“Tuir objetivu atividade ne’e, ita tenke garante inklusividade. Tanba ne’e, ita servisu hamutuk ho feto sira, delegadu sira iha suku, organizasaun feto, grupu feto, ema ho defisiénsia no komunidade sira, inklui sira ne’ebé moris iha área remota,” nia hatutan.
Nia salienta,formasaun kona-ba produsaun rádio no jornalizmu komunitáriu bele ajuda no aumenta kapasidade jornalista sira, iha prodútór rádio no media online. atu produz kontentu informativu, relevante no responde ba realidade no nesesidade komunidade.
Enkuantu hanesan parte husi esforsu atu hametin sosiedade sivíl no media lokal, FONGTIL sei kontinua servisu hamutuk ho parseiru no komunidade sira atu promove komunikasaun ne’ebé inkluziva no fó espasu ba grupu vulnerável sira atu partisipa iha prosesu komunikasaun no desenvolvimentu iha Timor-Leste.
Jornalista : Madalena de Lima
Editor :Manuel Andrade
