(Díli), Timor Plaza, 18/08/2026 – Governadór hato’o nia intensaun atu haforsa no dezenvolve tan ligasaun aviasaun entre Dili no Kupang, Indonézia, ho objetivu atu fasilita movimentu pasajeiru, atividade negósiu no kooperasaun entre Timor-Leste no Indonézia.
Iha konferénsia imprensa ne’e, Governadór Lourenço de Oliveira hatete katak nia sei buka oportunidade atu dezenvolve ligasaun aérea entre Dili no Kupang, tanba rota ne’e konsidera importante ba movimentu ema no atividade ekonomia entre nasaun rua.
“Intensaun ami mak atu haforsa no dezenvolve ligasaun aviasaun entre Dili no Kupang, atu fasilita movimentu pasajeiru, negósiu no kooperasaun entre Timor-Leste ho Indonézia,” hatete Governadór Lourenço de Oliveira iha Timor Plaza 18/08/2026.
Iha enkontru ne’e, Governadór simu informasaun kona-ba situasaun atual hosi operasaun aviasaun esplikasaun ne’e hatudu katak, iha momentu atual, slot ka espasu operasaun disponivel ba aviaun atu opera rota Dili Kupang la iha ona.
Aleinde limitasaun slot, oras operasaun ne’ebé disponivel mos seidauk sufisiente atu permite aviaun foun atu opera rota ne’e.
“Iha momentu atual, slot ka espasu operasaun disponivel ba aviaun atu opera rota Dili Kupang la iha ona oras operasaun ne’ebé disponivel mos seidauk sufisiente atu permite operasaun foun, esplikasaun ne’ebé hetan iha enkontru.
Tanba limitasaun hirak ne’e, oportunidade atu buka slot ka oras operasaun foun presiza reavalia iha tinan oin maske nune’e, se iha futuru bele aumenta tan aviaun ida no hetan slot ka oras operasaun ne’ebé adekuadu, sei iha posibilidade atu aviaun husi Dili bele opera diretamente ba Kupang.
Governadór mos haree katak, iha tempu naruk, ligasaun Dili Kupang bele sai baze atu dezenvolve koneksaun aérea ne’ebé liu tán ho Darwin, Austrália.
“Iha tempu naruk, ligasaun Dili Kupang bele sai baze ida atu dezenvolve koneksaun aérea ne’ebé liu tán ho Darwin, hodi liga Dili, Kupang no Darwin no kontribui ba turizmu, komérsiu no relasaun ekonomia,” hatete Governadór.
Ho dezenvolvimentu rede transporte aérea rejionál ne’e, espera bele fasilita asesu ba ema sira ne’ebé viaja entre sidade no nasaun hirak ne’e, aumenta movimentu pasajeiru no kria oportunidade foun ba setor turizmu, negósiu no kooperasaun ekonomia.
Proposta ne’e konsidera hanesan esforsu ida atu buka solusaun ba limitasaun aviasaun ne’ebé eziste atualmente, no iha tempu naruk haforsa rede transporte aérea entre Timor-Leste, Indonézia no Austrália.
Jornalista: Madalena/Zeferino
Editor: Ana Maria da Silva
