(Díli) Praia dos Coqueiros- Ministériu Negosiu Estranjeiru Kooperasaun (MNEC-sigla português) hala’o Reuniaun Téknika no Reuniaun Ministeriál ba dala XV ho nasaun sira hanesan; São Tomé Príncipe, Cabo-Verde, Angola, Moçambique, União Europeia, Guiné-Bissau inklui Timor-Leste reuniaun ne’e atu hametin kooperasaun no dezenvolve parseria entre Uniaun Europeia, Grupu Países Africanos de Língua Oficial Portuguesa (PALOP sigla Português) no Timor-Leste.
Diretór Jerál Asuntu Multiraterál, Leoneto Mantilo, hatete, hanesan halo abertura ba reuniaun téknika país Africano ba sira ne’ebé mak ko’alia ho língua ofisiál português ho Timor Leste inklui mós União Europeia.
“Abertura téknika ida ne’e hodi prepara ba reuniaun Ministeriál ne’ebé mak sei hala’o iha loron 6 fulan juñu tinan ne’e, reuniaun ida ne’e hahú ohin loron depois sei kontinua ba iha loron 5 no taka iha loron 6 ba iha nível ministerial”, hatete Diretór Jerál Asuntu Multiraterál, Leoneto Mantilu, iha salaun prinsipál MNEC, Kuarta, 04/06/2025.
Diretór ne’e hatete, Guine Bissau mak labele marka prezensa iha reuniaun ida nee, tanba kestaun téknika, país São Tomé Prinsipe, Cabo Verde, Angola no Moçambique iha sira mak sei partisipa iha reuniaun ministeriál ida ne’e.
“Iha reuniaun ministeriál ne’e sei ko’alia iha área tolu, primeiru ko’alia kona-ba Governasaun, segundu ko’alia kona-ba Justisa no ikus liu sei ko’alia kona-ba kultura, ida ne’e mak sei foka liu iha ne’eba”, hakotu nia
Entretantu reuniaun ne’e realiza durante loron tolu (3), hahú husi loron 4 to’o loron ne’en (6) fulan Juñu, iha reuniaun ne’e hetan partisipasaun masimu husi reprezentante nasaun sira hanesan; São Tomé Príncipe, Cabo Verde, Angola, Moçambique, União Europeia inklui Timor-Leste, nune’e Guiné-Bissau mak la marka prezensa tanba kestaun Téknika.
Jornalista: Rogerio Anuno
Editora: Quisânia Gleide
