(Díli), Merkadu Lama 24/07/2026 –Estudante Universitário Timor-Leste (EUTL) hamutuk ho Aliansa Motorista Nasional Maubere hasoru Ministru Transportes no Komunikasaun (MTK), Eng. Miguel Marques Gonçalves Manetelu, hodi diskute petisaun ne’ebé EUTL submete atu husu Governu hapara implementasaun taxa, enkontru ne’e realiza konstrutiva, ho objetivu atu buka solusaun liu-hosi diálogu.
Durante enkontru, EUTL no Aliansa Motorista Nasional Maubere hato’o preokupasaun kona-ba impaktu implementasaun taxa ne’ebé bele afeta estudante, motorista no komunidade jerál EUTL dehan petisaun ne’ebé sira submete reprezenta aspirasaun estudante universitáriu no parte husi povu ne’ebé sente preokupasaun kona-ba medida refere no ninia impaktu ba kondisaun ekonomia.
Ministru Transportes no Komunikasaun, Eng. Miguel Marques Gonçalves Manetelu, simu delegasaun EUTL no Aliansa Motorista Nasional Maubere no reafirma katak Governu nafatin valoriza komunikasaun no diálogu ho sidadaun.
“Governu simu ho respeitu petisaun ne’ebé EUTL no Aliansa Motorista Nasional Maubere hato’o ami konvida parte hotu atu kontinua tuir prosesu diálogu ofisiál, tanba liu-husi diálogu mak ita bele buka solusaun ne’ebé di’ak no respeita interese povu no nasaun,” dehan Ministru Miguel Marques Gonçalves Manetelu iha Merkadu lama 24/07/2026.
Ministru Miguel Marques mós hateten katak Governu sei estuda no konsidera preokupasaun sira ne’ebé hato’o durante enkontru antes foti desizaun sira ne’ebé relevante.
Iha fatin hanesan, porta-voz EUTL, Natalisiu Nunes Martins, dehan katak enkontru ho Ministru sai oportunidade importante ida atu Governu rona diretamente aspirasaun estudante no povu.
“Ami mai lori lian estudante no povu kona-ba preokupasaun implementasaun taxa petisaun ida-ne’e la’ós ba interese grupu ida de’it, maibé hodi husu Governu konsidera impaktu ne’ebé bele afeta moris povu ami apresia Ministru nia abertura atu simu ami no fó oportunidade ba diálogu ne’ebé konstrutivu,” hateten Natalisiu Nunes Martins.
Nia hatutan katak EUTL sei kontinua uza dalan pasífiku no diálogu institusionál hodi buka solusaun ba preokupasaun sira-ne’e.
EUTL konsidera abertura Governu atu halo diálogu hanesan pasu positivu ida atu hametin entendimentu entre Governu no sidadaun organizasaun ne’e espera katak prosesu diálogu sei kontinua ho transparénsia no bele lori rezultadu ne’ebé fó benefísiu ba estudante, motorista, povu no nasaun tomak.
Enkontru ne’e hatudu katak diálogu kontinua sai mekanizmu importante ida atu rezolve diferensa opiniaun no hametin partisipasaun públika iha prosesu formulasaun polítika no tomada desizaun Governu.
Jornalista/Estajiária : Josefina Maria
Editor : Ana Maria
