(Díli), Portu Díli, 20/07/2026 – Conselho dos Combatentes da Libertação Nacional sigla (CCLN) ofisialmente lansa no inaugura operasaun ró peskas foun tolu ho naran Kablaki, Paitchau no Maubai.
Serimónia ne’e realiza ho objetivu atu hametin infraestrutura setór peskas, fó apoiu ba komunidade peskadór sira no promove dezenvolvimentu ekonomia marítima ne’ebé sustentável iha Timor-Leste eventu ne’e mós hetan partisipasaun husi Xefe Gabinete Xefe Estadu Maior Jenerál F-FDTL, Coronel Marcelino Ximenes, hanesan sinal ida ba kompromisu F-FDTL atu apoia dezenvolvimentu nasionál.
Iha nia diskursu, Coronel Marcelino Ximenes hateten katak lansamentu ró peskas tolu ne’e la’ós de’it projetu infraestrutura, maibé mós reprezenta vizaun estratéjiku atu transforma setór peskas sai hanesan pilar importante ba ekonomia nasionál no moris-di’ak povu.
“Lansamentu ró peskas tolu ne’e la’ós de’it dezenvolvimentu fíziku, maibé mós reprezenta vizaun bo’ot CCLN nian atu transforma setór peskas sai hanesan fukun ba moris-di’ak povu Timor-Leste iha rekursu marítima ne’ebé bo’ot, tanba ne’e ita presiza ekipamentu modernu atu jere no aproveita rekursu sira-ne’e ho maneira sustentável,” dehan Coronel Marcelino Ximenes iha portu díli foin lalais ne’e.
Nia hatutan katak ró Kablaki, Paitchau no Maubai sei ajuda peskadór sira atu aumenta kapasidade peska, hasa’e produsaun nasionál no hamenus dependénsia ba importasaun produtu peskas husi rai li’ur.
Coronel Marcelino Ximenes mós fó apresiasaun ba inisiativa CCLN no veteranu sira ne’ebé kontinua kontribui ba dezenvolvimentu nasaun.
“Defeza nasionál la’ós de’it kona-ba kilat ka proteje fronteira defeza nasionál mós mak garante soberania ai-han no hametin ekonomia ne’ebé forte. F-FDTL prontu atu apoia inisiativa hotu ne’ebé bele lori benefísiu ba povu no dezenvolvimentu Timor-Leste moris-di’ak povu mak ami-nia prioridade, no setór peskas mak xave ida ba futuru nasaun nian,” nia dehan.
Husi parte organizadór, CCLN esplika katak projetu ró peskas ne’e mai husi kompromisu veteranu sira atu kontinua kontribui ba dezenvolvimentu rai ne’ebé uluk sira luta ba.
CCLN hateten katak liuhosi operasaun ró peskas tolu ne’e, organizasaun hakarak kria oportunidade servisu foun, la’ós de’it ba oan sira husi Kombatente Libertasaun Nasionál, maibé mós ba komunidade peskadór sira iha kosta Timor-Leste tomak.
Serimónia ne’e remata ho atmosfera ksolok no esperansa katak ró peskas Kablaki, Paitchau no Maubai sei fó kontribuisaun importante ba dezenvolvimentu ekonomia marítima, hasa’e produsaun peskas, hametin seguransa ai-han no melhora moris komunidade peskadór sira iha futuru.
Jornalista Estajiária : Melania De Jesus
Editor : Ana Maria
