(DILI), Timor-Leste — Serimónia abertura ba Parseiru Pasífiku 2026 (PP26) hala’o iha Timor-Leste, ho misaun ne’ebé foka ba asisténsia umanitária no preparasaun ba dezastre multinasionál iha rejiaun Indo-Pasífiku.
Iha diskursu abertura, Xefe Estadu-Maior-Jenerál F-FDTL tenente-Jenerál Domingos Raúl “Falur Rate Laek”hateten katak Parseiru Pasífiku nu’udar misaun asisténsia umanitária no preparasaun ba dezastre multinasionál anuál ne’ebé bo’ot liu hala’o iha rejiaun Indo-Pasífiku.
Misaun ne’e halibur nasaun uma-na’in no parseiru sira iha esforsu koletivu atu hametin interoperabilidade rejionál no kapasidade resposta ba dezastre. Kooperasaun ne’e mós kontribui ba seguransa no estabilidade rejiaun nian no ba konsolidasaun amizade entre povu sira.
Iha Timor-Leste, misaun ne’e sei envolve projetu enjeñaria, asaun sívika, asisténsia umanitária no ezersísiu resposta ba dezastre. Aleinde ne’e, iha mós inisiativa preparasaun médiku, atividade komunitária no atuasaun muzikál.
Xefe Estadu-Maior-Jenerál F-FDTL hateten katak servisu hamutuk, fahe koñesimentu no aplika lisaun sira ne’ebé aprende ona importante atu garante resposta efetivu ba dezafiu iha futuru.
Nia mós hateten katak Timor-Leste, ho nia vokasaun no istória, hanesan uma ba dame, uma ba unidade, uma ba rekonsiliasaun no uma amizade.
Ho espíritu ne’e, parseria sira kontinua harii atu iha kapasidade atu identifika no hatán ba dezafiu sira iha rejiaun, inklui mudansa klimátika, tufaun no fenómenu estremu sira seluk, no mós dinámika estratéjika sira ne’ebé presiza akompaña ho atensaun no prudénsia.
Tuir Xefe Estadu-Maior-Jenerál F-FDTL, kooperasaun ne’ebé selebra la’ós sukat de’it husi projetu ka ezersísiu sira ne’ebé remata ona, maibé liuliu husi konfiansa ne’ebé harii entre Forsa Armada no entre povu sira.
Iha serimónia ne’e, nia mós hato’o apresiasaun ba Estadus Unidus Amérika no nasaun parseiru sira hotu ba kompromisu no amizade ne’ebé hatudu durante dékada rua kooperasaun nian.
Nia hein katak serimónia abertura Pasífiku Parseiru 2026 marka, ho dignidade, inísiu ba kapítulu seluk iha parseria istórika ida-ne’e.
Jornalista: Ana Maria da Silva
Editor : Felisberto F. da Costa
