(Dili), Bairru Pite, 15/08/2026 — Komandante Jerál Polísia Nasionál Timor-Leste (PNTL), Komisáriu Asisténte Afonso dos Santos, husu ba membru Unidade Espesiál Polísia (UEP) atu kontinua hatudu disipliña, korajen no profesionalizmu iha hala’o sira-nia misaun atu garante seguransa no estabilidade iha Timor-Leste.
Afonso dos Santos hato’o pedidu ne’e iha serimónia komemorasaun aniversáriu UEP ba dala-17, ne’ebé hala’o iha Kuartél UEP, Bairru Pite, iha sábadu (15/08).
“Tinan 17 unidade ida ne’e nia ezisténsia reprezenta tinan 17 ba dedikasaun, disipliña, profesionalizmu no esperitu servisu ba nasaun. Ita bo’ot sira nia servisu dala barak ezijente no hala’o iha sirkunstánsia difisil, merese hetan respeitu no rekoñesimentu husi PNTL tomak,” dehan Afonso dos Santos.
Nia husu ba membru UEP atu kontinua kumpre misaun ho disipliña no korajen, no nafatin respeita sidadaun sira.
“Kontinua kumpri imi nia misaun ho disipliña, korajen, profesionalizmu no respeitu ba sidadaun sira, fó onra nafatin ba farda ne’ebé imi hatais no valores PNTL nian,” nia afirma.
Iha okaziaun ne’e, Komandante Jerál PNTL mós hato’o parabéns ba membru UEP tomak tanba unidade ne’e konsege to’o ba tinan 17 nia aniversáriu.
“PNTL nia naran, ha’u hato’o ha’u nia parabéns ba membru UEP tomak, ba ita bo’ot sira nia aniversáriu, dezeja susesu nafatin ba ita bo’ot sira nia misaun,” nia dehan.
Afonso dos Santos mós hato’o apresiasaun ba Ministru Interiór Francisco da Costa Guterres ne’ebé marka prezensa iha serimónia aniversáriu UEP. Nia konsidera prezensa hosi governante ne’e hanesan forma ida atu fó onra no prestíjiu ba unidade ne’e.
Komandante Jerál PNTL realsa katak aniversáriu UEP la’ós de’it atu komemora tinan 17 nia ezisténsia, maibé mós sai momentu atu rekoñese kontribuisaun unidade ne’e ba PNTL no seguransa nasionál.
“Ha’u hakarak hato’o ha’u nia agradesimentu sinseru ba parseiru nasionál no internasionál sira hotu ne’ebé iha tinan hirak nia laran fó apoiu ba dezenvolvimentu no kapasitasaun PNTL nian, liu-liu Unidade Espesiál Polísia,” nia dehan.
Nia mós hato’o agradesimentu ba Guarda Nacional Republicana (GNR) Portugal no Australian Federal Police (AFP) Australia tanba kooperasaun, formasaun, konsellu no apoiu ne’ebé fó kontinua ba UEP.
Afonso dos Santos mós agradese ba Governu no instituisaun sira hosi Repúblika Popular Xina, Repúblika Korea do Sul, Estados Unidos Amerika no Repúblika Indonézia tanba apoiu no kooperasaun ne’ebé kontribui ba hametin kapasidade PNTL.
Iha serimónia ne’ebé hanesan, Ministru Interiór Francisco da Costa Guterres hateten katak Governu komprometidu atu kontinua investe ba PNTL, liuliu UEP, hodi profisionaliza unidade ne’e no prepara nia membru sira atu hasoru ameasa krime transnasionál.
“Iha okaziaun ida ne’e mós hakarak hato’o ba ita bo’ot sira katak Governu komprometidu atu investe ba Polísia Nasionál Timor-Leste, liuliu ba ita bo’ot sira kondisaun ne’ebé loloos relevante ba ita bo’ot sira nia servisu ho di’ak,” dehan Francisco Guterres.
Ministru Interiór louva ba dedikasaun membru UEP sira ne’ebé, tuir nia, durante tinan hirak liubá fó sira-nia tempu no enerjia atu servisu ba nasaun.
Francisco Guterres mós rekoñese kontribuisaun komandante sira ne’ebé lidera UEP durante tinan hirak liubá, no konsidera sira-nia dedikasaun importante atu dezenvolve formasaun no kapasidade unidade ne’e.
Nia husu ba membru UEP atu mantein kapasidade, disipliña no profesionalizmu, no tau interese nasionál aas liu interese privadu.
“Husu nafatin ba ita bo’ot sira mantein nafatin ita bo’ot sira nia kapasidade servisu ho disipliña, halo servisu ho profesionalizmu ne’ebé aas, no tau interese nasionál aas duké interese privadu sira. Oras ne’e dadaun ita nia povu hein hela ita fó estabilidade, fó seguransa, fó hakmatek para sira bele hala’o sira nia vida loroloron nian,” nia afirma.
Ministru Interiór hateten katak responsabilidade UEP importante tebes tanba unidade ne’e dala barak hasoru situasaun kompleksu, risku no situasaun esepsionál iha hala’o misaun.
“Unidade ida ne’e sempre hasoru komplesidade oioin, risku oioin, situasaun ne’ebé mak esepsionál, maibé ita bo’ot sira nia prezensa hodi ultrapasa situasaun sira ne’e, hodi fó hakmatek ba ita nia povu no ba ita nia nasaun, hodi kontinua hala’o ita nia dezenvolvimentu,” nia dehan.
Francisco Guterres konsidera mandatu ne’ebé fó ba UEP hanesan mandatu ida ne’ebé ezijente tebes, tanba husu ba membru sira atu servisu ho disipliña, korajen no sentidu misaun.
Nia mós rekoñese méritu no dedikasaun membru UEP sira ne’ebé, tuir nia, fó sira-nia vida no dedikasaun tomak atu hala’o misaun hodi garante estabilidade ba nasaun.
Ministru Interiór hateten katak preparasaun UEP sai importante liután tanba Timor-Leste enfrenta prosesu integrasaun rejionál no ameasa krime organizadu transnasionál.
“Tanba ne’e mak ezije tebes atu bele hala’o servisu hodi kombate hamutuk ho instituisaun relevante hotu-hotu, atu nune’e ita bele fó resposta ida ne’ebé loloos disipliñadu ho téknika ne’ebé di’ak, atu nune’e kombate kualker situasaun ne’ebé la di’ak iha ita nia rai,” nia dehan.
Governu, liuhosi Ministériu Interiór, promete kontinua fó apoiu ba PNTL, liu-liu ba UEP, hodi hasa’e kapasidade no prontidaun membru sira atu responde ba dezafiu seguransa, inklui krime organizadu transnasionál.
Jornalista: Ana Maria da Silva
Editór : Felisberto F. Da Costa
