(Díli), Caikoli 28/07/2026 – Porta-voz PNTL, Superintendente Xefe Polísia João Belo dos Reis, hamutuk ho Xefe Relasaun Públika, aprezenta rezultadu husi servisu operasaun seguransa sira ne’ebé realiza ho kordenasaun entre Polícia Nasionál Timor-Leste (PNTL), Forsa Defeza Timor-Leste (F-FDTL), Servisu Intelijénsia no autoridade marítima kompetente sira.
Liu husi operasaun ne’e, autoridade seguransa sira konsege Prende sigaru kontrabandu iha área maritima (tasi) Baucau, inklui taka/desamantela fatin ne’ebé suspeita utiliza ba atividade scam call center, no detein estranjeiru barak ne’ebé komfirmadu suspeitu ba kazu ne’e, oras ne’e dadaun sei hela iha prosesu investigasaun hodi determina sira-nia envolvimentu iha atividade ilegal refere.
Porta-voz Superintendente Xefe Polísia Joao Belo dos Reis hateten,durante ne’e F-FDTL no PNTL kontinua monitoriza movimentu ro’o sira ne’ebé sirkula iha tasi Timor, husi monitorizasaun hirak ne’e autoridade seguransa suspeita ro’o ilegal ida tula sasan ilegal tama mai Timor-Leste liuhusi area maritima (tasi).
“Ita nia autoridade marítima hamutuk ho PNTL halo intervensaun ba ro’o ida ne’ebé hatún ankor iha área tasi Baucau depois hapara ro’o ne’e, ami lori mai Díli atu halo prosesu aprezensaun no investigasaun,” dehan Porta-voz PNTL iha kaikoli,Dili foin lalais ne’e liuhusi konferensia emprensa.
Husi operasaun ne’e, autoridade konsege preende sigaru karton hamutuk 2.583, kompostu husi sigaru marka ION-ION, Marlboro, Marlboro Mutin husi Indonesia no marka seluk tan. Sigaru hirak-ne’e tuir informasaun investigasaun tama ilegal husi area maritima (tasi) no depois fahe ba merkadu iha Díli no munisípiu sira.
Durante operasaun, autoridade sira identifika no detéin suspeitu nain hitu (7) iha fatin kompostu husi sidadaun Myanmar nain lima (5) no sidadaun China nain rua (2), autoridade sira hateten,sidadaun estranjeiru hirak-ne’e hela ona iha Timor-Leste durante períodu tempu naruk nia laran.
Porta-voz ne’e hatutan,operasaun ne’e hatudu kapasidade no koordenasaun di’ak entre seguransa F-FDTL no PNTL iha servisu konjuntu hodi deteta no interseta atividade kontrabandu ne’ebé uza fronteira no teritóriu Timor-Leste atu halo atividade ilísita, operasaun ne’e mós hatudu kompromisu autoridade seguransa sira atu proteje soberania nasionál, hametin kontrolu fronteira no garante seguransa ba povu no Estadu Timor-Leste.
“Sasan ne’ebé tama la tuir prosedimentu legal la selu taxa importasaun, prejudika reseita Estadu no bele mos lori risku ba saúde públika,” nia hatutan.
Porta-voz hateten,prosesu identifikasaun no investigasaun sei lao hela no iha tempu badak sei entrega sira ba Ministériu Públiku.
PNTL la iha Toleránsia ba kontrabandu no Scam Call Center iha mensajen ba komunidade, Porta-voz PNTL afirma operasaun hirak-ne’e hatudu kompromisu forte husi Forsa Seguransa no F-FDTL atu proteje soberania nasional, orden públiku no bem-estar povu Timor-Leste.
“Kontrabandu la’ós de’it halo estadu lakon reseita, maibé mos finansia rede kriminozu sira hanesan mos scam call center, ne’e sai ona krime modernu ne’ebé estraga ekonomia, dignidade no iha balun nia kazu afeta saúde mental husi vítima sira. PNTL la sei fó toleránsia ba atividade ilegal hanesan ne’e iha Timor-Leste,” afirma Porta-voz.
Enkuantu iha parte seluk,ekipa seguransa halo operasaun ida iha área Cristo Rei, iha hotel ida ne’ebé hanaran Jl Word,no autoridade detekta ema hamutuk 30, kompostu husi sidadaun China nain 29 no sidadaun Laos ida (1) no dadaun ne’e detein hela iha sela detensaun PNTL Komoro no sei aprezenta ba Ministériu Públiku (MP) atu kontinua prosesu tuir dalan legal.
DSIK no Servisu Imigrasaun detein mos estranjeiru 62 ne’ebe envolve iha atividade ilisitu online Scam Call Center , enkuantu operasaun seluk realiza iha area Komoro husi Servisu Imigrasaun, Servisu Informasaun intelejensia no DSIK konsege desmantela tan fatin ne’ebé suspeitu halo scam call center, kompostu husi Sidadaun Indonézia 28,China 33 Sidadaun Índia 1
Ho nune’e PNTL apela ba komunidade atu kontinua fó informasaun ba autoridade bainhira haree movimentu suspeitu, atu hametin seguransa nasional no prevene atividade kriminoza sira iha rai laran.
Jornalista/Estajiada : Josefina Maria
Editor : Ana Maria
