(Manatuto), Santo Antonio 27/07/2026) – Salaun Parókia Manatuto ohin loron nakonu ho komunidade hamutuk ema nain 225 ne’ebé partisipasaun iha atividade sosializasaun kona-ba prevensaun HIV/SIDA, ne’ebé organiza husi Presidenti INCSIDA, I.P atividade ne’e la’ós de’it fó informasaun kona-ba moras HIV/SIDA, maibé mos sai hanesan espasu edukativu atu hasa’e konsiénsia no responsabilidade sosial entre komunidade, liu-liu juventude sira, durante atividade ne’e, komunidade sira hatudu interese bo’ot ba tema ne’ebé fo ba sira liu husi sosializsaun
Iha oportunidade ne’e, Prezidenti INCSIDA, I.P. Daniel marcal prezensa instituisaun ne’e iha Munisípiu Manatuto tanba haree katak área refere iha risku aas ba transmisaun HIV/SIDA.
“INCSIDA mai halo sosializasaun iha Manatuto tanba haree katak munisípiu ida ne’e iha risku ba moras HIV/SIDA dadus hatudu katak iha Timor-Leste kazu HIV/SIDA to’o ona ka liu ema nain 2.600 resin, no Manatuto mos rejista kazu ema ne’ebe kona moras HIV/SIDA hamutuk ema nain 29 tanba ne’e mak ita presiza tau matan di’ak ba buat sira ne’e ,” hatete Prezidenti INCSIDA Daniel Marcal iha santo antonio 27/07/2026.
Nia mos hatutan katak edukasaun no moral sai fator importante atu prevene komportamentu risku, liu-liu relasaun seksuál la seguru tuir nia, grupu idade produtiva no juventude sira mak sai alvu prinsipal ba kampaña prevensaun ne’e.
“Ita presiza fó hanoin ba juventude sira atu hadook-an husi seksu livre hetan edukasaun di’ak no moral di’ak bele ajuda prevene situasaun sira ne’ebé labele lori ema ba risku HIV,” nia dehan.
Durante sosializasaun ne’e, Prezidenti INCSIDA mos husu inan-aman sira no lideransa komunidade atu aumenta sira-nia atensaun ba edukasaun saúde reprodutiva no prevensaun HIV iha família no komunidade.
Iha fatin hanesan, Diretór Saúde Munisípiu Manatuto, Alfim Pereira, hatete katak pasiente sira ne’ebé identifika ho HIV iha munisípiu Manatuto hamutuk 29 ne’e atualmente simu ona tratamentu ho di’ak no kontinua konsumu aimoruk antirretroviral (ARV) regularmente.
“Pasiente sira ne’ebé hetan HIV iha Manatuto hotu halo tratamentu ho di’ak sira kontinua konsumu aimoruk kada loron tuir orientasaun saúde nian atu kontrola moras ne’e no prevene transmisaun ba ema seluk,” hatete director saude Alfim Pereira.
Nia mos enkoraja komunidade atu besik ba fasilidade saúde sira no halo teste sedu bainhira presiza, tanba deteisaun lalais bele ajuda tratamentu sai efetivu liu.
Reprezentante komunidade, Engrásia Soares, dehan katak informasaun ne’ebé nia simu iha sosializasaun ne’e importante tebes ba nia no nia bele fahe fali ba komunidade sira ne’ebe ohin la partisipa iha atividade ida ne’e.
“Hau kontente tebes tanba hetan informasaun edukativu ida ne’e esperensia sira ne’ebé hau aprende ohin ha’u se’I fahe ba ha’u-nia família no komunidade atu sira mos komprende risku HIV/SIDA no hadook-an husi komportamentu ne’ebé bele lori ba moras ne’e,” hatete Engrásia.
Atividade sosializasaun ne’e remata ho fo hanoin ba komunidade tomak atu hametin kooperasaun entre família, igreja, eskola no instituisaun saúde sira hodi hamutuk prevene HIV/SIDA no promove moris saudável iha Munisípiu Manatuto.
Jornalista: Media Mudansa
