(Díli, Garden Beach Hotel Pantai kelapa 23/07/2026) – Sekretaria Estadu ba Formasaun Profisionál no Empregu (SEFOPE), liu-husi Institutu Nasionál ba Combate ao HIV-SIDA (INCSIDA), realiza formasaun ba trabalhador Timor-Leste hamutuk ema 100 resin ne’ebé prepara-an atu partisipa iha programa empregu sazonal no mobilidade laboral iha Austrália.
Formasaun ne’e hala’o iha Garden Beach Hotel, Panti Kelapa, ho objetivu atu hasa’e kapasidade no prepara trabalhador sira atu bele adapta-an ho padraun servisu internasionál, inklui komprende kultura servisu, disiplinha, saúde no seguransa iha fatin servisu, direitu no obrigasaun trabalhador, no komunikasaun efetiva.
Iha atividade ne’e, Prezidente Incsida, Daniel Marçal, hateten katak formasaun ne’e sai hanesan etapa importante ida atu prepara trabalhador sira molok viajam ba Austrália tuir nia, alén husi koñesimentu tékniku, trabalhador sira presiza iha komprensaun di’ak kona-ba kultura servisu, disiplinha, saúde no seguransa, direitu no obrigasaun, no komunikasaun efetiva iha ambiente servisu internasionál.
“Incsida kontinua servisu hamutuk ho Sefope atu garante katak trabalhador Timor-Leste sira ne’ebé ba servisu iha rai-li’ur iha kapasidade, disiplinha no responsabilidade atu reprezenta di’ak Timor-Leste ami hein katak koñesimentu ne’ebé sira hetan iha formasaun ida-ne’e bele sai baze ba susesu sira iha fatin servisu,” dehan Daniel Marçal iha Garden Beach Hotel Pantai kelapa 23/07/2026
Tuir programa ne’e, formasaun sei fó benefísiu ba partisipante sira liu-husi hasa’e sira-nia koñesimentu no prepara sira atu hasoru dezafiu iha ambiente servisu internasionál espera katak esperiénsia no kapasidade ne’ebé trabalhador sira hetan sei lori benefísiu ba sira-nia família no kontribui ba dezenvolvimentu ekonomia nasional.
Iha fatin hanesan, Koordenadór Programa Pdb-Dnee/Lsu Sefope, Agustinho Maia, esplika katak formasaun ne’e nu’udar etapa obrigatóriu molok trabalhador sira viajam ba Austrália.
Nia hatutan katak, alén husi matéria téknika, partisipante sira simu mos orientasaun kona-ba direitu no obrigasaun trabalhador, komunikasaun efetiva, saúde no seguransa iha fatin servisu, no oinsá atu adapta-an ho kultura servisu iha Austrália.
“Husi preparasaun ida-ne’e mak atu garante trabalhador Timor oan sira la’o ho konfiansa no iha kompeténsia ne’ebé di’ak Bainhira sira hatudu desempenho ne’ebé di’ak iha Austrália, ida-ne’e sei loke oportunidade barak liután ba ema Timor oan sira seluk atu partisipa iha programa mobilidade laboral,” hateten Agustinho Maia.
Iha sorin seluk Holmes Guterres, husi trabalhador ne’ebé partisipa iha formasaun, hato’o agradese ba Sefope no Incsida tanba fó oportunidade ba sira atu simu formasaun kona-ba prevensaun Hiv-Sida molok ba servisu iha Austrália.
Nia konsidera katak formasaun ne’e importante tebes tanba fó preparasaun ba trabalhador sira molok hahú knaar iha ambiente servisu foun.
“Hau sente orgullu tanba hetan oportunidade atu tuir formasaun ida-ne’e kona-ba Hiv-Sida ami aprende buat barak kona-ba oinsá atu servisu ho di’ak, respeita regra, no prepara-an atu hasoru ambiente servisu foun ha’u fiar katak formasaun ida-ne’e sei ajuda ami atu servisu ho di’ak no lori naran Timor-Leste ba di’ak iha Austrália,” dehan Holmes Guterres.
Formasaun ne’e envolve trabalhador 100 resin husi munisípiu oioin no sei kontinua ho matéria sira kona-ba étika profisionál, saúde no seguransa iha fatin servisu, direitu trabalhador, komunikasaun efetiva, no kultura servisu iha Austrália.
Sefope no Incsida reafirma sira-nia kompromisu atu kontinua prepara rekursu umanu Timor-Leste ne’ebé kualifikadu no kompetitivu, atu bele partisipa no tama iha merkadu traballu internasionál.
Jornalista/Estajiária : Josefina Maria
Editor : Ana Maria
