(Díli), 23/07/2026 – Joaquim “Russuo” Fonseca ohin, ofisialmente, deklara nia intensaun atu aprezenta nia kandidatura ba kargu Prezidente Repúblika Demokrátika Timor-Leste iha Eleisaun Prezidensiál ne’ebé sei realiza iha tinan 2027.
Deklarasaun ne’e mai hafoin nia halo refleksaun kle’an kona-ba situasaun polítika no dezenvolvimentu nasaun nian, inklui dezafiu estruturál no governasaun ne’ebé, tuir nia avaliasaun, kontinua presiza atensaun séria husi lideransa nasional.
Fonseca hatete katak nia desizaun atu konsidera nia kandidatura bazeia ba nia komitmentu no dever ba povu Timor-Leste, liuliu iha esforsu atu kontribui ba prosesu reforma institusionál, hametin estabilidade nasionál, promove dezenvolvimentu ekonómiku no fortalece sistema demokrátiku iha nasaun.
Tuir nia, Timor-Leste daudaun ne’e hasoru dezafiu estruturál no governasaun ne’ebé grave, ne’ebé presiza resposta no reforma institusionál ne’ebé efetivu atu garante estabilidade no dezenvolvimentu sustentável ba futuru.
“Nune’e, se la iha mudansa boot iha kuadru legál no hametin integridade institusionál, dezafiu sira ne’e bele sai todan liu tan iha futuru no tau risku ba estabilidade nasaun nian,” hatete Joaquim “Russuo” Fonseca 23/07/2026.
Nia mós subliña katak Timor-Leste presiza lideransa ne’ebé bazeia ba prinsípiu, vizaun no responsabilidade maske respeita sakrifísiu no kontribuisaun líder sira ne’ebé luta ba independénsia, Fonseca konsidera katak governasaun iha Estadu demokrátiku tenke fundamenta liután iha meritokrasia, kompeténsia profisionál, integridade no kompromisu ba Estadu de Direitu.
“Timor-Leste presiza lideransa ne’ebé bele fó ezemplu liu-husi kompeténsia, integridade no responsabilidade, hodi asegura katak instituisaun estadu sira funsiona ho transparénsia no tuir prinsípiu demokrátiku,” nia afirma.
Iha tempu hanesan, Joaquim “Russuo” Fonseca informa katak, iha momentu ne’e, nia sei kontinua hala’o nia atividade profisionál iha rai-li’ur, ne’ebé obriga nia atu hela iha li’ur durante períodu badak maske nune’e, nia garante katak situasaun ne’e la sei impede nia hodi kontinua komunika ho povu Timor-Leste no órgaun komunikasaun sosiál.
Nia hatete katak komunikasaun aberta ho sidadaun no imprensa sei sai parte importante husi nia prosesu polítiku, hodi fó espasu ba povu atu komprende nia vizaun, husu pergunta no fó komentáriu kona-ba asuntu sira ne’ebé afeta interese nasional.
“Lideransa hahú ho komunikasaun ne’ebé loke. Ha’u hakarak ko’alia diretamente ho mídia atu hateten ha’u nia vizaun, simu pergunta sira no mantein kontaktu permanente ho povu Timor-Leste,” nia hatutan.
Fonseca mós reafirma katak imprensa independente no livre iha papel importante iha prosesu hametin demokrasia tuir nia, média tenke sai nu’udar ponte entre lideransa polítika no sidadaun, liu-liu iha prosesu promove diálogu públiku, transparénsia no responsabilizasaun.
Nia hatutan katak liu-husi média, nia hakarak kontinua promove diálogu transparente ho sidadaun sira, maski nia hela iha rai-li’ur, hodi fahe nia vizaun kona-ba reforma institusionál, dezenvolvimentu nasaun no unidade nasionál.
Deklarasaun ida ne’e marka hahú husi etapa polítika foun ba Joaquim “Russuo” Fonseca, ne’ebé hatudu nia intensaun atu konkore ba kargu Prezidente Repúblika iha Eleisaun Prezidensiál 2027. Nia kandidatura sei tuir prosesu no rekizitu legál sira ne’ebé estabelese iha Konstituisaun Repúblika Demokrátika Timor-Leste no lei eleitorál ne’ebé vigora, ’’nia hakotu
Jornalista : Madalena de Lima
Editor : Ana Maria
