(Dili), Lahane Ocidental, 15/06/2026 – Partidu Kmanek Haburas Unidade Nasionál Timor-oan (Sigla-KHUNTO) realiza atividade re-ajustamentu estrutura organizativa iha Postu Administrativu Nain Feto, Munisípiu Dili, no simultaneamente hala’o tomada pose ba membru juventude foun hamutuk nain 30 resin iha Suku Lahane Oriental, atividade ne’e hanesan parte husi estratéjia partidu atu reforsa organizasaun iha nível baze no prepara an ba polítiku sira iha futuru.
Iha serimónia ne’e, lideransa KHUNTO husi nível lokal no nasional marka prezensa hodi fó orientasaun ba membru sira, reprezentante partidu sira fó parabéns ba juventude no lideransa foun ne’ebé simu pose, no husu atu sira hala’o knaar ho responsabilidade, disiplina no dedikasaun atu responde ba nesesidade povu nian.
Kordenador Partidu KHUNTO Mario Cobra hatete,organizasaun forte iha nível baze sai hanesan elementu importante ida atu asegura partidu bele kontinua servisu ho efetividade no mantein relasaun besik ho komunidade, sira mos enfatiza katak, maske rezultadu eleitoral iha períodu uluk seidauk tuir objetivu tomak partidu nian’
“KHUNTO kontinua iha fiar no konfiansa katak suporta husi povu sei aumenta liu tan iha eleisaun sira tuir mai, dehan Kordenador Mario Cobra iha Lahane Oreantal foi lalais ne’e” Diskursu Kordenador Partidu KHUNTO Mario Cobra iha suku Lahane, Foin lalais ne’e .
Iha fatin hanesan Konseleiru Maximu Partidu KHUNTO, Naimori Bucar hatete, unidade no solidariedade entre militante sira mak sai nu’udar xave atu fortifika partidu no garante continuidade programa sira ne’ebé orienta ba bem-estar povu nian, nia apela ba juventude sira ne’ebé foin simu pose atu sai ezemplu di’ak iha komunidade no kontribui ativamente ba dezenvolvimentu sosial no polítiku.
“Ita tenki hametin unidade no servisu hamutuk, partidu ida forte hahú husi baze ida forte, juventude sira tenki sai forsa mudansa ne’ebé bele lori mensajen no programa partidu nian ba povu,” dehan Naimori.
Naimori mos fó sai nia intensaun polítika atu konkorre ba eleisaun presidensial iha tinan 2027, tuir nia, kandidatura ne’e sei orienta ba programa sira ne’ebé fó prioridade ba apoiu sosial, reduzaun pobreza no fortalese ekonomia família sira iha rai laran.
Nia apresenta mós proposta programa sosial ida ne’ebé konsidera importante atu ajuda família sira, liu-liu inan sira ne’ebé durante ne’e kontribui ba sustenta família maibé la tama iha setor servisu formal.
“Ha’u maka kandidatu ba prezidente iha 2027, inan isin rua sira sei simu osan 200 kada fulan, no kada tinan família ida sei simu 500 atu bele ajuda ekonomia família nian, ema sira ne’ebé servisu iha kantor sempre simu salariu, tanba ne’e ha’u hanoin inan sira mos tenki hetan apoiu atu bele ajuda sustenta família,” nia salienta.
Tuir nia, programa ne’e sei fó oportunidade ba família sira atu hasae kondisaun moris no ajuda reduz presaun ekonomia ne’ebé komunidade balu enfrenta, nia argumenta katak kontribuisaun inan sira iha edukasaun oan, jestaun uma-kain no dezenvolvimentu sosial merese atensaun no apoiu husi Estadu.
Entretantu, proposta ne’e sei presiza estudu klean no avaliasaun kona-ba sustentabilidade orsamentu Estadu no mekanizmu implementasaun atu bele garante benefísiu sira to’o ba grupu alvu ho transparénsia no efisiénsia.
Atividade ne’e remata ho atmosfera unidade no entusiasmo husi militante no simpatizante sira. Lideransa KHUNTO husu ba membru hotu-hotu atu kontinua hametin kooperasaun, alarga organizasaun ba área sira ne’ebé seidauk hetan kobrementu no prepara an ba prosesu polítiku importante sira ne’ebé sei mai iha tinan 2027.
Partidu ne’e reafirma nia kompromisu atu kontinua servisu hamutuk ho komunidade no promove programa sira ne’ebé konsidera bele melhora kondisaun moris povu Timor-Leste nian.
Jornalista/ Estajiada : Caryn Camōes
Editor : Ana Maria da Silva
