(Díli), Jardin 5 de Maio, 15 /07/ 2026 – Uniaun Estudante Universitáriu Munisípiu Viqueque (UEUMV) anunsia sei hamutuk Ho Estudante Universitário Timor leste (EUTL) tempu badak sei halo manefestasaun pasífika iha parlamento nasional, hodi hato’o protestu ba polítika Governu ne’ebé fó impaktu ba moris povu, liberdade sidadáun no dezenvolvimentu nasaun. Ho manifestasaun ne’e atu hato’o aspirasaun estudante no komunidade kona-ba asuntu sira ne’ebé konsidera importante ba futuru Timor-Leste.
Iha komunikadu imrprensa Porta Voz Uniaun Estudante Universitáriu Munisípiu Viqueque (UEUMV) Antonio Gomes hato’o ezijénsia prinsipál neen (6) ba Governu no Parlamentu Nasional, mak hanasan ,avalia fila fali polítika taxa tarifária ,Presu kombustivel folin sa’e, Reviza lei kona-ba subvensaun ba partidu polítiku ho montante dolares amerikanu $4 ba kada votu,Projetu Lei Kriminalizasaun Difamasaun no Injúria, Reviza Lei Liberdade Reuniaun no Manifestasaun, inklui dispozisaun kona-ba kláuzula 100 metru, Aumenta investimentu Orsamentu Jeral Estadu (OJE) ba setor produtivu hodi kria oportunidade servisu no hasa’e ekonomia.
Porta Voz UEUMV salienta, la’ós atu kria konflitu, maibé hanesan meiu demokrátiku ida atu estudante no povu bele hato’o sira-nia lian. Pontu sira ne’e iha relasaun direta ho interese povu no presiza hetan konsultasaun públika kle’an liu antes Governu no Parlamentu foti desizaun final.
” Iha tempu badak Ami sei organiza manifestasaun ida-ne’e ho forma pasífika no respeita lei. Ami hakarak Governu no Parlamentu rona estudante no komunidade sira-nia preokupasaun molok implementa polítika sira ne’ebé bele afeta moris povu,” dehan Porta voz UEUMV iha konferensia imprensa, jardim 05 de Maio,Díli, 15/07/2026.
Nia husu ba partisipante hotu atu mantein dame durante atividade ne’e no evita aktu provokasaun ruma husi terseira pessoa.
Iha fatin hanesan,Estudante Merita da silva soares argumenta, movimentu ne’e importante atu fó oportunidade ba juventude hato’o sira-nia preokupasaun konaba aspirasaun komunidade.
“Manefestasaun pasífika mak direitu ami nian. Ami hakarak autoridade sira rona ami-nia lian no buka solusaun ba problema sira ne’ebé afeta povu, la’ós estudante deit,” hatutan nia
Nia salienta,partisipasaun juventude iha prosesu demokrátiku bele fortalece transparénsia no responsabilidade públika. Manifestasaun pasífika mak parte importante husi sistema demokrátiku, maibé hotu-hotu tenke respeita lei no direitu ema seluk.
“organizadór no autoridade presiza servisu hamutuk atu garante seguransa, ordem públika no evita violénsia,” nia rekomenda.
Nia mos husu Governu no Parlamentu atu konsidera aspirasaun ne’ebé hato’o husi estudante sira hanesan parte husi prosesu formulasaun polítika públika. No organizasaun UEUMV mos konvida estudante universitáriu sira, juventude, organizasaun sosiedade sivil no públiku jerál atu partisipa iha manifestasaun ne’e ho maneira pasífika, respeita lei, ordem públika no evita asaun sira ne’ebé bele hamosu violénsia.
Jornalista/Estajiada :Natália de Carvalho Gomes/ Josefina Maria freitas Desá
Editor :Ana Maria
