(Díli), Aeroportu Internasional Nikolau Lobatu, 01/09/2026 – Preladu bispu nain tolu, Mgr. Martinho da Costa, Dom Jaime Garcia no Dom Jaime Joaquim Ribeiro, to’o iha Aeroportu Internasional Nicolau Lobato, Dili, ho aviaun Aero Dili no simu ho lia dadolin/sergala tuir kultura Timor-Leste akompaña ho parada Guarda-Militar no mos simu direita husi membru Governu, eis-titulares,FALINTIL-Força Defesa Timor-Leste (F-FDTL), Polícia Nacional Timor-Leste (PNTL), lideransa Igreja no komunidade sarani katolika.
Resepsaun ba seremonia simu restus mortais bispu nain tolu akompaña mos husi paróquia Imaculada Coração de Maria, Maubisse-Picoma, Munisípiu Ainaro, ne’ebé reprezenta kultura Timor-Leste iha momentu importante ida ne’e.
Responsável grupu kultura Paróquia Imaculada Coração de Maria Maubisse-Picoma, Paula Doutel Sarmento hatete,grupu kultural ne’ebe prepara ho seremonia ritual tradisionál tuir tradisaun kultural Timor-Lesteatu simu preladu amu bispu nain tolu.
“Preparasaun kultura Timor-Leste ne’e, hodi simu restus mortais amu bispu nain tolu,tuir kultura nebe ita iha” hatete Paula Doutel Sarmento iha Aeroportu Internasional Nicolau Lobato, iha Dili, Tersa-feira (1/09/2026).
Nia salienta,iha resepsaun urnas bispu nain tolu lori liu husi área VIP aeroportu, no grupu kultura Picoma hala’o ritual tradisionál ho nahe biti no tidin lalo no bua malus. Ritual ne’e konsidera nu’udar símbolu hosi rai lulik no forma respeitu ba amu bispu nain tolu nia kontribuisaun ba Timor-Leste.
“Picoma reprezenta kultura Timor-Leste, ho nahe biti tidin lalo no bua malus hodi simu preladu Bispu nain Tolu hanesan simbolu respeitu ba sira (restus mortais Bispu nain tolu) nia kontribuisaun,” nia hatutan.
Paula deklara, ritual simu urnas sei kontinua ho tebe, dahur no oeliku, ne’ebé nu’udar parte hosi espresaun kultura tradisionál Timor-Leste ne’ebe baibain halo iha seremonia sira.
“Ami sei simu urnas refere ho tebe, dahur no oliku, ka segala rua. Bainhira amu bispu nain tolu to’o iha tasi tolu, foin loke no tanis hodi hatudu katak amu nain tolu ne’e mate lolos ona,” nia hakotu
Jornalista : Ana Maria da Silva
Editor :Manuel Andrade
