(Díli) ,komoro ,15 /07/2026- Iha kbiit ho pasiénsia nia leet, mak sai dalan ba joven ho naran kompletu Ricardo Tani, orijin husi Rejiaun Administrativa Espesiál Oecusse-Ambeno (RAEOA), ho esforsu hatudu ezemplu moris ne’ebé nakonu ho fuan-boot no duni ninia futuru liu husi peneira rai henek iha mota Komoro,nia la hein de’it oportunidade serbisu formal husi estadu.
Hahu husi tinan 2023, Ricardo hili dalan moris ne’ebé todan hodi sai nu’udar badinas-na’in pineira rai-henek iha mota laran, ho kondisaun loron manas,udan no anin maibe desizaun ne’e nu’udar resposta kmanek ida ba nia, tamba ba nia susar boot atu hetan serbisu ne’ebé oras ne’e daudaun sai dezafiu boot ba nia no joven barak iha Timor-Leste. Atividade serbisu loron-loron nian ne’ebe nia halo la’ós buat ne’ebé fasil no seguru.
Ricardo tenke duni ninia moris liuhusi tempu no sirkunstánsia ne’ebé dalaruma la tuir ninia hakarak, Iha sirkunstánsia balun.
“ha’u tenke hein husi dadeer-saan to’o lokraik iha mota laran, maibé kliente ida la mai sosa,” haktuir Ricardo ba Jornalista Media Mudansa iha mota laran Komoro,Díli,15/07/2026
Nia deklara,dezafiu boot mós mosu kuandu loron ida ka rua nia laran, nia iha mota laran maibé rezultadu mamuk. To’o ikus nia, nia tenke fila liman-mamuk ba uma ho esperansa katak aban sei iha naroman foun.
“ dala ruma tenki fila ho liman mamuk ba uma tamba ema la sosa,maibe nafatin esforsu ba loron aban” tenik Ricardo
Difikuldade seluk ne’ebé Ricardo hasoru mós dalaruma iha mudansa klimátika ka tempu udan boot, rai henek ne’ebe prepara ona udan bo’ot mota tun lori hotu, nune’e mos Iha tempu bailoron, rai-henek sai toos tebes no difisil atu suru.
Enkuantu iha tempu udan, maske rai-henek sai mamar, nia tenke tesi-lia no hadau malu fali ho korente mota nian ne’ebé lori risku boot ba nia seguransa.
“Maske sente todan ho moris ne’e, maibe dalan maki da ne’e ona “ nia subliña
Bazeia ba Ricardo badinas, dalaruma deit loron ida nia bele hetan osan hamutuk $15 to’o $20 iha loron ida. Ho osan ne’e nia koko jere sai sai fuan ba ninia kbiit hodi sustenta nesesidade família no ajuda selu ninia alin sira-nia eskola .
“Moris iha Timor-Leste susar duni atu hetan serbisu formál, maibé ida-ne’e la’ós razaun atu ita rende an, Moris mak nune’e duni, ita tenke simu dezafiu ho fuan-boot” nia deklara.
Enkunatu iha parte seluk, Ricardo mós hato’o ninia mensajen kle’an no lian motivasaun boot ba joven sira seluk iha ita-nia Rai doben Timor-Leste katak,labele atu buka problema ka kria konflito maibe tenki badinas maske ho kbit nebe’’e naton deit
“Nudar joven, ita labele preokupa ho problema no fokus de’it ba problema ne’ebé mak iha ita nia moris. Maibé, ita tenke badinas, hakat sai, no buka serbisu sira ne’ebé Iha maske kbiit-liman de’it ne’ebé bele fó valor, dignidade, no lori naroman ba ita-nia moris no família” nia hakotu.
Jornalista /Estagiada : Melania De Jesus
Editor :Ana Maria
