(Díli), Ailoklaran 11/08/2026 – Nofiano de Jesus, estudante Universidade Nasionál Timor Lorosa’e (UNTL), ho tinan 18, mai husi Munisípiu Ainaro no hakat ain husi foho mai sidade Dili atu kontinua nia estudu maibé, iha sorin seluk, nia mos hili atu sai vendedór ki’ik hodi buka osan rasik atu suporta kustu eskola, kos, hahán no nesesidade loron-loron, sein depende deit ba osan husi inan-aman.
Nofiano hahú fa’an sasan besik tinan ida ona, atividade ne’e sai hanesan dalan ida ba nia atu bele hetan osan ba nesesidade loron-loron, liu-liu ba kustu eskola no moris iha Dili.
Ba Nofiano, fa’an sasan la’ós de’it atividade atu hetan osan, maibé mos sai hanesan maneira ida atu aprende sai independente no responsabiliza ba nia moris rasik.
“Ha’u faan sasan ida ne’e besik ba tinan ida ona no hau senti katak sasan ne’ebé maka hau faan ne’e bele ajuda tebes hau, tamba durante ne’e hau la husu osan ba inan-aman. Tan deit sasan ne’ebé maka hau faan ne’e bele sustenta hau ba han-hemu no mos ba presiza husi eskola nian tantu uma laran nian hotu,” hateten Nofiano de Jesus iha Ailoklaran, 11/08/2026.
Estudante ne’ebé hela iha kos iha dili ne’e hateten katak nia tenki faan sasan depois de remata atividade eskola osan ne’ebé nia hetan husi venda sasan uza atu selu transporte, hahán no sosa nesesidade seluk ne’ebé relasiona ho eskola no moris loroloron.
“Ha’u mai iha Dili ne’e ha’u kos deit maka ha’u hodi ba eskolaee maka hau iha hanoin ida atu sosa sasan sira mai faan hanesan ne’e para osan funan sira ne’e ha’u bele uza ba hodi selu bemo no mos han iha eskola nian no sosa sasan presiza sira seluk tan,” nia dehan.
Atividade ne’e hahú ho kapital hamutuk $100. Nofiano uza osan ne’e atu sosa sasan sira ne’ebé nia bele faan fali ba ema sosa ho osan ne’ebé nia hetan husi vendas, nia planeia aumenta tan kapital atu bele sosa sasan barak liu tán.
“Sasan sira agora daudaun ha’u fa’an ne’e, primeiru ha’u hodi osan hamutuk $100 maka fa’an sasan ida ne’e no osan funan mos agora sae tan ha’u mos bele aumenta tan osan funan ne’e para hodi sosa tan sasan, para halo barak,” Nofiano dehan.
Maske negósiu ne’e sei ki’ik, Nofiano sente kontente tanba sasan ne’ebé nia fa’an hetan interese husi ema sosa nia hateten katak kada loron, vendas bele to’o $20, maske iha loron balun deit bele hetan $15.
“Sasan ne’ebé ha’u fa’an ne’e ema sosa, hanesan ita bele dehan diak duni, tamba ha’u nia kios ne’ebé maka sasan uitoan deit kada loron ema bele sosa to’o $20, dala ruma $15 dolar kada loron ida ha’u mos senti kontenti tebes ho sasan ne’ebé maka hau faan ne’e,” nia deklara.
Ba Nofiano, rezultadu ne’ebé nia hetan husi faan sasan ne’e hatudu katak estudante sira mos bele buka oportunidade atu hetan rendimentu, maski iha kapital limitadu. Nia fiar katak vontade no iniciativa rasik importante atu bele hahú atividade ekonomia ki’ik.
Nofiano mos iha mensajem ba estudante no jovem sira atu la depende deit ba osan husi inan-aman nia enkoraja sira atu buka maneira rasik atu bele hetan osan no suporta nesesidade sira.
“Hau nia mensajem ikus ba maluk kolega estudante sira katak ita labele hein deit atu husu osan ba inan-aman deit. Ita mos tenki iha menu ida oinsa no hau halo nusa hau bele iha osan atu nune’e hau mos bele suporta hau nia an rasik. No ida ne’e maka hau nia mensajem no ba maluk joven sira labele moe atu faan sasan sira hanesan ne’e,” nia hakotu.
Istória Nofiano hatudu katak estudu no buka osan bele lao hamutuk bainhira iha vontade, iniciativa no responsabilidade ba estudante jovem ne’e, fa’an sasan sai la’ós deit fonte osan, maibé mos esperiénsia ida atu aprende moris independente no prepara an ba futuru.
Jornalista: Dina
Editor: Ana Maria
