(Díli), Matadouro, 16/07/2026) – Autoridade Inspeksaun no Fiskalizasaun Atividade Ekonómika, Sanitária no Alimentár (AIFAESA, I.P.) realiza programa Avaliasaun Trimestral Daruak (Q2) 2026 ho objetivu atu sukat implementasaun programa servisu iha trimestre daruak, avalia rezultadu sira ne’ebé alkansa ona no prepara estratéjia atu hadi’a prestasaun instituisaun iha trimestre tuirmai.
Programa avaliasaun ne’e involve lideransa AIFAESA, diretór sira, xefe departamentu, xefe seksaun, koordenadór munisípiu no funsionáriu husi unidade hotu-hotu Durante enkontru ne’e, kada unidade aprezenta relatóriu kona-ba atividade sira ne’ebé implementa durante trimestre daruak, inklui servisu inspeksaun, fiskalizasaun, monitorizasaun no sensibilizasaun ba komunidade.
Inspetora-Jerál AIFAESA, Dra. Odete da Silva Viegas, hatete avaliasaun trimestral sai instrumentu importante ida atu sukat implementasaun programa servisu ne’ebé AIFAESA hala’o durante trimestre daruak iha tinan 2026.
Nia hatutan katak avaliasaun ne’e la’ós deit atu haree rezultadu servisu, maibé mós atu identifika dezafiu sira ne’ebé hasoru durante implementasaun programa no buka solusaun atu hadi’a prestasaun servisu iha trimestre tuirmai.
“Avaliasaun trimestral ne’e importante tebes tanba husi ne’e ita bele sukat progresu programa sira ne’ebé implementa ona, identifika fraqueza sira no hametin servisu hamutuk entre departamentu hotu-hotu ha’u hein katak husi enkontru ida ne’e sei hamosu rekomendasaun sira ne’ebé bele hadi’a prestasaun servisu AIFAESA ba futuru,” dehan Inspetora-Jerál AIFAESA, Dra. Odete da Silva Viegas iha edifisiu AIFAESA, I.P Matadoru 16/07/2026
Nia mós husu ba funsionáriu hotu-hotu atu uza oportunidade ida ne’e hodi halo avaliasaun ho laran nakloke, fó kontribuisaun konstrutiva no hametin komitmentu atu kontinua fó servisu ne’ebé profesional, transparente no responsavel ba povu Timor-Leste.
Avaliasaun ne’e sai hanesan mekanizmu importante atu haree progresu implementasaun programa servisu, identifika dezafiu sira ne’ebé hasoru iha terenu no buka solusaun atu hadi’a efisiénsia no efetividade servisu instituisaun.
Aleinde ne’e, AIFAESA mós entrega sertifikadu apresiasaun ba funsionáriu no unidade balun ne’ebé hatudu desempenhu di’ak durante implementasaun programa servisu iha trimestre daruak, hanesan forma rekonesimentu ba dedikasaun, profesionalizmu no responsabilidade sira.
Inspetora-Jerál mós husu ba funsionáriu hotu atu kontinua hametin profesionalizmu, integridade no responsabilidade iha hala’o knaar inspeksaun no fiskalizasaun iha territóriu nasionál.
Husi observasaun, programa avaliasaun ne’e la’ós deit atu sukat desempenhu servisu, maibé mós atu hametin komunikasaun interna, espírito servisu hamutuk no asegura katak programa AIFAESA ba trimestre tuirmai bele implementa ho efikás hodi proteje konsumidór no garante atividade ekonómika, sanitária no alimentár ne’ebé seguru iha Timor-Leste.
Jornalista/Estajiáda : Josefina Maria Freitas Desá
Editor : Ana Maria
