(Díli), Palásiu Governu, 10/08/2026 – Embaixador foun Malásia ba Timor-Leste, Fairuz Rozali, realiza enkontru ho Vice-Primeiru-Ministru Timor-Leste hodi ko’alia kona-ba hametin kooperasaun entre nasaun rua, liu-liu iha área dezenvolvimentu rural no setores seluk ne’ebé konsidera importante ba dezenvolvimentu nasional.
Enkontru ne’e mos sai oportunidade ba Embaixador Fairuz Rozali atu aprezenta an ba governu Timor-Leste, hafoin nia simu ona Karta Kredensiál husi Prezidente Repúblika Timor-Leste.
Vice-Primeiru-Ministru hato’o apresiasaun ba Embaixador foun Malásia ne’ebé mai halo enkontru no subliña katak kooperasaun entre Timor-Leste no Malásia tenki kontinua hametin tan.
“Kolaborasaun ho Malásia tenki diak liu tan.
Nia mos hateten katak kooperasaun entre nasaun rua durante ne’e fó ona benefísiu iha área oin-oin, inklui edukasaun, agrikultura, infraestrutura, formasaun no dezenvolvimentu kapasidade umana.
“Atividade lubun bo’ot ida ne’ebé Malásia ajuda ona ita, liu husi edukasaun, agrikultura, infraestrutura, formasaun no mos kapasidade buat sira ne’e hotu mak ami diskute ona iha enkontru ida ne’e.”
Aleinde kooperasaun iha área dezenvolvimentu, relasaun entre Timor-Leste no Malásia mos kontinua iha área edukasaun, saúde no turizmu sidadaun Timor-Leste barak liu ba Malásia atu kontinua eskola, halo tratamentu saúde no halo vizita turístika.
Vice-Primeiru-Ministru mos hato’o apresiasaun ba governu no povo Malásia kona-ba hospitalidade ne’ebé fó ba sidadaun Timor-Leste durante sira nia estadia iha Malásia.
“Ami agradese ba Embaixador Malásia tamba foin daudaun ami ba Malásia, ami hetan duni hospitalidade ne’ebé diak.”
Nia mos hatutan katak relasaun diak entre Timor-Leste no Malásia sai importante liu tán iha konteksu Timor-Leste nia integrasaun iha ASEAN, ne’ebé mos loke oportunidade foun ba kooperasaun ekonomia, komérsiu, investimentu no interasaun entre povu rua.
Iha fatin hanesan , Malásia kontinua hatudu apoiu ba Timor-Leste liu husi kooperasaun no atividade promosaun ne’ebé hala’o iha Timor-Leste situasaun ne’e konsidera hanesan parte husi esforsu atu hametin amizade no relasaun bilaterál entre nasaun rua.
Enkontru entre Embaixador Fairuz Rozali no Vice-Primeiru-Ministru mos aborda relasaun kooperasaun ne’ebé uluk ona estabelese entre governu Timor-Leste no Malásia, inklui iha área dezenvolvimentu rural.
Tuir informasaun ne’ebé hato’o, enkontru ne’e la limita de’it ba dezenvolvimentu rural, maibé mos trata kona-ba aspetu jerál relasaun no kooperasaun entre Timor-Leste no Malásia.
Kooperasaun bilateral ne’e espera kontinua hametin iha futuru, liu liu iha setores ne’ebé bele fó kontribuisaun direta ba dezenvolvimentu Timor-Leste no hadi’a relasaun entre nasaun rua.
Jornalista: Domingas / Ostelina.
Editor: Ana Maria
