(Díli), Delta 1 03/08/2026 – Husi família, kolega akademiku, estudante no komunidade sira bainhira rona notisia triste konaba Professor Bendito Freitas Ribeiro ne’ebe aman Maromak bolu hikas ona ba nia kandunan santo iha sidáde Qifu, nasaun Japáun, iha loron 15 fulan Jullu 2026, iha tuku ha’at dader tuir oras Japáun.
Professor Bendito Freitas Ribeiro Moris iha Munisipiu Viqueque loron 10/06/1983 no nia hakotu nia peregrinasaun iha sidáde Qifu, Japáun. hafoin halao hela nia estudu,ho nune’e família hamutuk ho autoridade no parseiru sira,servisu hamutuk hodi prepara prosesu transladasaun mate isin mai Timor-Leste.
Maske família hakarak lori lalais mate isin fila mai Timor-leste maibe, prosesu ne’e tenke tuir prosedimentu internasionál ne’ebé rigorozu tanba ne’e, família esplika katak presiza tempu, koordinasaun no koperasaun di’ak entre entidade relevante sira iha Japáun no Timor-Leste.
“Familia hamutuk ho autoridade no parseiru sira kontinua halo esforsu tomak atu fasilita prosesu transladasaun mate isin husi nasaun Japáun mai Timor-Leste ami hakarak hato’o katak prosesu ida ne’e presiza tuir duni lei, prosedimentu administrativu no rekizitu saúde públika husi nasaun rua ne’e tamba ne’e, prosesu ida ne’e presiza tempu no koperasaun di’ak husi entidade hotu ne’ebé iha responsabilidade.” Hateten husi familia Matebian Bendito Freitas foin lalais ne’e.
Durante tempu lutu no triste nia laran, família mos simu apoiu husi Governu Timor-Leste, hanesan Embaixada Timor-Leste iha Japáun, JICA, JAIZ, kolega servisu, estudante Universitariu no sivitas akademiku inklui komunidade balun ho família konsidera apoiu ne’e hanesan fonte forsa atu kontinua enfrenta situasaun difísil ida ne’e.
“Familia hato’o agradese wa’in ba Governu Timor-Leste, Embaixada Timor-Leste iha Japáun, JICA, JAIZ, no ema hotu ne’ebé fó apoiu moral, espirituál no material durante prosesu ida ne’e.” nia hatutan
Família mos husu ba públiku atu respeita privasidade durante períodu lutu no kontinua halo orasaun ba alma matebian.
“Ami husu ba públiku, komunidade sivíl, akademika no kolega sira atu kontinua fó orasaun ba Aman Professor Bendito Freitas Ribeiro no respeita privasidade família durante tempu lutu ida ne’e.” nia hatete
Tuir programa ne’ebé família prepara, mate isin sei to’o Timor-Leste iha loron 06 Agostu 2026 iha Aeroportu Internasionál Presidente Nicolau Lobato no sei hala’o serimónia entrega ofisiál husi JICA ba família, tuir kedas ho serimónia kultura liu husi tara tais no lia dadolin husi familia Watulari hafoin, mate isin sei lori ba Igreja Maria Auxiliadora Dom Bosco atu realiza misa ba alma matebian antes kontinua ba rezidénsia família iha Delta 1 (Dili).
tuir orariu ne’ebe iha, loron 6 no 7 fulan Agostu, komunidade no familia sei ba vizita matebian iha rezidénsia, no iha loron 8 fulan Agostu, sei visita husi sivitas akademiku,estudante universitariu sira husi Universidade Nasional Timor Lorosa’e (UNTL ) no Politéknika Hera, inklui sei organiza omenajen espesial atu fó respeitu ba legado akademiku no servisu Professor Bendito Freitas Ribeiro ne’ebe nia halao durante nia moris ba instituisaun estadu hanesan eskoal Universidade Nasional Timor Lorosa’e (UNTL ).
Programa funebre no sepultamentu sei remata iha loron 11 fulan Agostu 2026, iha Postu Administrativu Watulari, Munisípiu Viqueque, Suku Mata We’en, Aldeia Tatilare, fatin ne’ebé família no komunidade sei fó despedida ikus ba nia.
Iha tempu ida ne’ebe lutu sei domina família no lembransa kona-ba Professor Bendito Freitas Ribeiro kontinua moris iha estudante no komunidade sira inklui kolega akademiku no ema hotu ne’ebé durante tinan barak aprende husi nia matenek, nia dedikasaun no nia servisu ba edukasaun iha Timor-Leste. Solidariedade ne’ebé kontinua mai husi parte oin-oin hatudu katak nia kontribuisaun la’ós de’it iha sala aula, maibé mos iha komunidade tomak.
Ekipa: Media Mudansa
