(Díli), Matadoru 24/07/2026 – seremonia ne’e hala’o iha Edifísiu Rekrutamentu Matadouro, nakonu ho esperansa no entusiasmo bainhira Ministériu Finansas (MF) hamutuk ho Komisaun Funsaun Públika (KFP) ofisialmente lansa teste eletróniku ba rekrutamentu ajente Administrasaun iha Autoridade Aduaneira Alfándega no Autoridade Tributária Impostu.
Sistema foun ne’e uza komputadór hodi hala’o teste ho objetivu atu garante prosesu rekrutamentu ne’ebé transparente, modernu no profisionál, hodi hasa’e tan konfiansa públiku ba sistema seleksaun funsionáriu públiku iha Timor-Leste.
Tuir dadus husi KFP, iha loron dahuluk teste ne’e, kandidatu hamutuk na’in 302 mak rejista atu tuir teste husi númeru ne’e, 224 kandidatu kompostu husi mane 119 no feto 105 mak marka prezensa no tuir teste, enkuantu kandidatu 78 la marka prezensa, kompostu husi mane 38 no feto 40.
Prezidente Komisaun Funsaun Públika (KFP), Agostinho Leténcio de Deus, hateten katak sistema eletróniku foun ne’e la depende ba avaliasaun juri, maibé hotu-hotu depende ba kapasidade no koñesimentu kandidatu ida-idak sistema ne’e mós uza pergunta aleatória (random), nune’e kandidatu sira labele kopia malu maske tur besik malu.
“Teste ida ne’e depende deit ba kandidatu sira ida-idak prosesu teste rekrutamentu hanesan ida ne’e mos atu hodi hases tiha kritika katak rekrutamentu ne’e iha partidarizasaun, sukuizmu, familiarizmu no seluk tan,” dehan Prezidente KFP, Agostinho Leténcio de Deus iha edifisiu Rekrutamentu Matadouro foin lalais ne’e.
Prezidente KFP, Agostinho mós husu ba kandidatu sira atu uza tempu oras rua ne’ebé disponivel ho di’ak, lee pergunta sira ho kuidadu no la presiza ansiosu atu remata lalais tanba hakarak haree de’it rezultadu final.
Iha serimónia ne’ebé hanesan, Ministra Finansas, Santina José Rodrigues F. Viegas Cardoso, hatutan katak oportunidade rekrutamentu ida ne’e atrai interese bo’ot husi komunidade, ho aplikante liu husi 10.000 ema ne’ebé rejista ba vaga sira ne’e.
“Oportunidade ne’e mai dala ida, tamba iha Administrasaun Públika kuaze rekrutamentu ba funsionáriu públiku hahu husi tinan 2016 la iha rekrutamentu ita bo’ot sira mak sai hanesan ezemplu no padraun diak ida,” hatutun Ministra Finansas, Santina José Rodrigues F. Viegas Cardoso.
Ministra mós elojia fasilidade teste iha Edifísiu Rekrutamentu Matadouro ne’ebé konsidera modernu no preparadu di’ak atu suporta prosesu seleksaun ne’ebé transparente nia espera sistema teste eletróniku ida ne’e bele sai padraun foun ba rekrutamentu funsionáriu públiku ne’ebé nakonu ho integridade, akontabilidade no kualidade, hodi fó servisu di’ak liu ba Estadu no povu Timor-Leste.
Jornalista/Estajiada: Melania De Jesus
Editor: Ana Maria
