(Díli), Palásiu Governu, 20/07/2026- Vise-Primeiru Ministru, Ministru Koordenadór ba Asuntu Dezenvolvimentu Rurál no Abitasaun, Mariano Assanami Sabino, simu vizita kortezia husi Reprezentante Embaixada Repúblika Sosialista Vietnam iha Timor-Leste, Pham Binh Dam, iha Palásiu Governu, Díli.
Iha Enkontru ne’e diskusaun kona-ba planu kooperasaun estratéjika ba futuru hodi hametin liu-tán relasaun bilaterál entre Timor-Leste no Vietnam, liu-liu iha área sira ne’ebé konsidera prioridade ba dezenvolvimentu nasaun.
Durante enkontru ne’e, lider sira diskute oinsá hametin parseria iha área prioridade sira hanesan agrikultura, edukasaun, dezenvolvimentu rekursu umanu no setór estratéjiku seluk vietnam, ne’ebé iha esperiénsia naruk no rezultadu di’ak iha dezenvolvimentu agríkola, reafirma ninia prontidaun atu fahe koñesimentu, esperiénsia no apoiu tékniku hodi ajuda Timor-Leste hasa’e produtividade no kapasidade iha setór ne’e.
Iha ekontru ne’e Reprezentante Embaixada Vietnam, Pham Binh Dam, hateten katak vizita ne’e halo parte husi programa rotina embaixada nian atu monitoriza no avalia progresu kooperasaun entre nasaun rua, no mós buka oportunidade foun ba parseria.
“Vizita ida-ne’e halo parte husi programa rotina embaixada atu monitoriza no avalia progresu kooperasaun entre Timor-Leste no Vietnam. Ami hakarak kontinua buka oportunidade foun atu hametin parseria iha área sira ne’ebé bele fó benefísiu ba povu nasaun rua, liuliu iha agrikultura, edukasaun no dezenvolvimentu rekursu umanu,” hateten Pham Binh Dam iha palasiu Governu 20/07/2026 .
Ba Timor-Leste, ne’ebé agora tama ona ba membru ASEAN, relasaun metin ho Vietnam konsidera nu’udar dalan importante ida atu aprende husi esperiénsia nasaun ida-ne’ebé konsege dezenvolve ekonomia, agrikultura no integrasaun rejionál ho susesu.
Reprezentante Asesór Vise-Primeiru Ministru, Cristopher Hendri Samson, hateten katak momentu ida-ne’e iha signifikadu espesiál tanba Timor-Leste agora iha ona embaixada permanente iha Vietnam, no vizita ne’e kontinua rezultadu husi vizita ofisiál delegasaun Vise-Primeiru Ministru ba Hanoi ne’ebé realiza foin lalais.
“Vizita ida-ne’e sai oportunidade di’ak atu troka informasaun no avalia rezultadu kooperasaun ne’ebé iha ona Timor-Leste no Vietnam asina ona akordu ida iha área edukasaun, no agora ita presiza kontinua aprende husi malu, liuliu tanba ita hotu agora membru família ASEAN. Vietnam iha kapasidade boot iha agrikultura no área seluk, no sira prontu atu kontinua serbisu hamutuk ho Governu Timor-Leste,” hateten Cristopher Hendri Samson.
Iha enkontru ne’e mós, parte Vietnam informa katak sira sei partisipa iha lansamentu embarkasaun foun ida ne’ebé investidór Vietnam harii ona no hahú operasaun iha tasi projetu ne’e espera bele sai ezemplu ida hodi atrai investimentu estranjeiru liután ba Timor-Leste, liu-liu iha setór marítima, lojístika no ekonomia.
Iha rohan enkontru, Vise-Primeiru Ministru Mariano Assanami Sabino hato’o apresiasaun ba Governu no povu Vietnam tanba sira-nia apoiu no amizade ne’ebé kontinua durante tinan barak.
“Governu Timor-Leste valoriza tebes parseria ho Vietnam tanba kooperasaun ida-ne’e la’o deit iha nivel diplomátiku, maibé mós bele fó kontribuisaun direta ba dezenvolvimentu sustentável, hasa’e kapasidade rekursu umanu no promove prosperidade ba povu nasaun rua ami hakarak kontinua hametin relasaun amizade no servisu hamutuk ba futuru ida ne’ebé di’ak liután,” nia hakotu.
Jornalista/Estajiária : Melania De Jesus
Editor : Ana Maria
